Afghanistan anüdoklen lendong nung nisung 16 asü

Jalalabad, Metsüremi/March 06 (Agencies): Afghanistan anüdoklen construction company ka nung Bodhbarnep taküm bendanga agütsür lendong agütsüba nung nisung tajemba agi 16 asü, ta ketdangsertemi ashi.
Jalalabad nung ghonda ishika lendong agütsüba ya Bodhbarnep züngia lia tenzük aser anaben ola tulu adoka apokba sülen iba tesemi mitkatem ilonga ao, ta osangbenertemi ashi. Jalalabad ya Nangarhar province indang yimtiba lir.
“Company nung inyaker 16 asü aser parnok teku yiru. Security force temi lendong agütsür pongu tepsetogo,” ta provincial odongtar Attaullah Khogyani-i osangbener dang ashi.
Iba tesem merüktetba mapang lir aser sepaitemi suicide vest ana, bomb bena aliba gari ka aser lendong agütsürtemi ali nung rema aliba mine ana raksaa indokogo, ta pai ashi.
“Raraba hadir bener aliba suicide bomber temi nija meyong kiojen yangluba company indang ki telungi anepdang yakta ait,” ta Nangarhar Provincial council züngsem Zabihullah Zmarai-i ashi.
“Company nung mapa inyaker civilian aika tepset,” ta paisa ashi.
Iba lendong asoshi telok katia tenüng agia mali, saka iba Nangarhar province nung Islamic State telok aser Taliban telok kanga yakyaka lir.
Küm 18 jungnüa Afghanistan nung raraba tembangtsü nükjidong nung US aser Taliban tsüngta Qatar nung yimjung ken o jembiba mapang ka nung iba lendong ya ataloker.
Hopta tatemlen anogo ana anisüngzükaka anogoshi amai yimjung ken o jembir aser terenlokba lir, ta US State Department odongtar Robert Palladino-i osangbener dang Mongulbarnü shia liasü.
“Item jembishinü ya maneni alir aser tarutsü nung tezüngzüktep alitsü asoshi sendaktepa aliba onük pezü nung temulung agütsür,” ta Palladino-i ashi. Item onük pezüji kiralongraba, sepaitem anizüker aoba, intra-Afghan dialogue aser ceasefire lir.
US aser Taliban telok tsüngta yimjung ken o maneni jembiaka taoba hopta southwestern Afghanistan indang Helmand province nung US-Afghan base amakdang sepai 23 tepseta liasü.
Afghanistan alinük tuluka nung rer kanga sashia alaba ajanga tang azüdokshi kanga ajema küma lir, saka tzüngsangmopung talemba akümdang azüdokshi tali adoktsü akok.
Tir Donald Trump-i Afghanistan nung America nungeri shilem agiba tatem kati arudaktsünüba tejangraba aiben shiogo, kong US sepai 14,000 tang tashi lir.