Kabul, January 27 (Agencies): Afghanistan nung tongpang kanga sashia raraba ajanga tang chiyongtsüa mongui alir nübur million jenti yaritsü asoshi teyari sen dollar sen million 393 shi nungdakba osang ka United Nations (UN)-i tanü Bodbar nü metetdaktsüogo.
“Afghan nüburtem nem chiyongtsü, mozü mora, tajemtsü tzü aser iba amala tang rongdaka nungdakba chiyongtsü aser osettsüset agüja nisung million 3.5 shi yaritsü alizüng 2016 Humanitarian Response Plan (HRP), Afghanistan mapatong kübok yua lir. Anungji, alimai UN den yaritepa Afghan nüburtem yaritsü ayongzüker,” ta UN Humanitarian Coordinator, Mark Bowden-i tanü metetdaktsü.
Alimai nungdakba senotsü agüja Afghan nüburtem yaritsü mapatong ka Afghan Chief Executive, Abdullah Abdullah den aroki Kabul yimti nung tenzüktsüdang Bowden-i iba tayongzükba olen ya sangoktsü.
“Yaküm, 2015 küma tongpang kanga sashia raraba ajanga Afghan nübur nisung 300,000 dak temai pei talikdak toktsütsüsa akümba osang bushitetogo. Ibaji taoba 2014 küm dang nungi shilem 160 agi timba akümer lir. Taküm, 2016 küma Afghan nübur nisung 25,000 shi pei talidak toktsütsüsa akümtsü akok,” ta Bowden-i ashi.
Paisa ashiba agi, kidangsüa tentetba Pakistan mitkartemi telungpur aser kiralongrartem mita arishitsü tenzükba sülen Afghanistan nung Pakistan nunger refugee kibong 40,000 shi jenoka aliba osang bushiteta lir.
“Yaküm nangzüka yaritepba ama, alima linüktemi taküma nungdakba senotsü teyari agüja ozü Afghanistan nüburtem yaritsü imlar,” ta Abdullah-ia metetdaktsü.
Afghanistan linük ya alima ajunga nung sensaktiba tia nung alir linüktem rong nung densema lir.
You must be logged in to post a comment Login