Afghanistan: Bomb lendong nung 61 pokset, 207 shi yiru

Afghanistan yimtiba, Kabul nung bomb lendong tesashi ka atalokba sülen lendong nung yirur aser asürtem ali nung mena/zükdaka aliba noksa nung angur. (Kabul, July 23)

Kabul, July 23 (Agencies): Afghanistan yimtiba, Kabul nung bomb lendong tesashi ka atalokba osang ka Afghanistan health ministry otongdar, Mohammad Ismail Kawasi-i tanü, Honibar nü metetdaktsüogo.
“Tanü Kabul yimtiba nung bomb lendong tesashi ka atalokba sülen ishiba agi nisung 61 poksetba aser nisung 207 dak tema yiruba osang tang tashi nung jangjaogo,” ta pai osang jangjashitsü.
Makamaiti aliba Bamiyan province ajangdanga light inzü mesangtsü takhangba benokba Hazara nisung meyirijang jenti tanü Kabul yimti yimdong nung longkak aitdang tanü lendongji atalokba osang jangjaogo.
“Peisasa pokseta asütsü mulungteter kati pa temang nung alenokba bomb pokdakja tanü lendongji ataloktsü. Ano, tan lendong nung yirur aika kanga mejungi yirua aliba yong nisung asüba osangji tang jangjaba den timba akümtsü akok,” ta otongdari shisem.
“Kiralongrartemi tanü lendong atalokdakja, longkak aiter nisung jenti den miktar o sorkar ketdangsertem jenti pokseta yirutsüogo aser iba ama lapi mapa inyakertem aitsür. Tan lendong atalokdaktsür pua parnok ozüngi mela ama merenshitsü nangzüker,” ta Afghanistan Tir, Ashraf Ghani-ia metetdaktsüogo.
Ano külen, tan lendong atalokdaktsüba atema telok shingaia tang tashi nung tenüng agia mali aser Taliban telok otongdar, Zabihullah Mujahid-ia tan lendongji par telok mapa masüba olen ka metetdaktsüogo.