Afghanistan: Bomb lendong nung nisung 36 shi pokset; 40 shi yiru

Afghanistan kübok Kunar province yimtiba, Asadabad nung atalokdaktsüba pokshiba lendong nung yirur ka mozüki tonga anir aoba noksa ka yangi angur. (Asadabad, February 27)

Kabul, February 27 (Agencies): Peisasa pokseta asütsü mulungteter Taliban telungpur kati pa temang nung alenokba pokshiba oset pokdakja Afghanistan kübok Kabul nung tentetba Defence Ministry kimalen lendong tesashi ka tanü, Honibar nü atalokdaktsüba osang jangjaogo.
Ajisüaka, tanü lendong nung par mitkar züngsem kwi shi pokset aser nisung kwi yiru iba osang tejangjabo Afghanistan miktar lenirtemi tang tashi metetdakja mali.
“Tanü ozü züngsem kati bomb lendong tesashi ka atalokdaktsü aser Afghan mitkar ketdangser 23 tashi poksetdaktsüba den külemi, mitkar züngsem jenti yirutsüogo,” ta shia, Taliban otongdar, Zabihullah Mujahid-i tanü lendong atalokdaktsüba atema tenüng agia metetdaktsü.
“Tanü lendong atalokdaktsür ajunga aitsür,” ta shia, tan amala lendong atalokdaktsü tashibo Afghanistan nung yimji yimjung kodanga melitettsü ta Afghanistan’er Chief Executive, Abdullah Abdullah-ia metetdaktsü.
Kidangsüa aliba Pakistan linük nung Taliban aser tanüngba telungpur teloktem den taruba hopta yimjung senden amentsü ayongba indang shia, “Taliban teloki yimjung aser lendong atalokdaktsüsü na rong nung ka shimtsüla,” ta pai shisem.
Ano külen, Afghanistan anüdoklen, Kunar province yimtiba, Asadabad nung tentetba governor office ki kimalena peisasa pokseta asütsü mulungteter kati motorcycle ka anir arua pa temang nung alenokba pokshiba oset pokdakja lendong atalokdaktsüba osang jangjaogo.
Governor-bar office kimalen atalokdaktsüba bomb lendong nung ishiba agi nisung 13 poksetba aser nisung 40 shi yiruba osang tang tashi nung janjaogo ta ketdangsertemi metetdaktsü.
Ajisüaka, tanabuba lendong atalokdaktsüba atemabo telok shingaia tang tashi nung tenüng agia metetdakja mali.
Ano, Afghan special forces mitkartemi Afghanistan anülulentip tsütsülen, Helmand province kübok Nadali district nung Taliban telungpur telok tesep ka yasüng mita amakba sülen tetsür aser tila tanurtem densema, Taliban teloki tashiyim agi pua ayur nisung 35 tashi kümzüka anitetba osanga jangjaogo.
Afghanistan nung tan amala lendongtsüdong atalokba ajanga yaküm, 2015 küm kisüng nung nisung 3,500 shi asüba den külemi, nisung 11,000 shi yiruba osang bushitetba olen ka United Nations-ia taoba hopta metetdaktsüogo.