Afghanistan-i ochimashi anema raratsü renemogo: Ghani

 

Afghanistan yimtiba, Kabul kübok Amani high school nung ayongba ochimashi anema raratsü sentong nung Afghan Tir, Ashraf Ghani-i o jembia shilem agiba noksa nung angur. (Kabul, September 01)

 Kabul, September 01 (Agencies): Afghanistan-i ochimashi anema raratsü renemba osang ka Afghanistan Tir, Ashraf Ghani-i tanü Mongolbar nü metetdaktsüogo.

“Ochimashi inyakba ajanga ozü linük indang rongsenren jenjang tajungba kümdakja nüburtem rong nung mapa inyaktsü lenmang lapoktsütsüren nem tetsükdakba tulu bener arutsür,” ta pai metetdaktsü.

“Ochimashi inyakba ya cancer komo tamajung ka mesüka lir aser linük nung ochimashi inyakba ajanga linük aser nübur jenjang tekübokleni bener lutsür,” ta Afghan Tir menden küm 1 shi abensang, Ghani-i ashi.

“Ozü Afghanistan-i tang ochimashi ajanga sorkar nungi contract mapa agiba, ozüng alema ali rakzüka agiba aser sorkar nungi temelaba magi mozü mora yanglua kasaji shibelenba amala timtem tulu ajurutsü tenzüka lir,” ta shia, par linük nung ochimashi inyakbarenji tesayuba tajung agütsüba ajanga dang agietettsü ta pai metetdaktsü.

Ano, par Afghan nüburtem timbaka alu ayimba wadang nung nokdaka aliba yong Afghan sorkari aluayimbaren nung sen jenti inoka lir ta ashiba den külemi, par Afghanistan ya ozüngi melaba osettsüset yokshiba linük ka ta alimai züngokdaktsütsü alizüng ayuba olen ka Ghani-i tanü lemsatep.

Alima ajunga nung ozüng alema shibelenba temeseptsü heroin timba adokdak, Afghanistan ya alima ajunga nung ochimashi maparen tesashitiba inyakba linük ta Transparency International telokia metetdakja lir.

Ano külen, Afghanistan anüdoklentip tsütsü Baghlan province nung mejangjatetba prangpong abener telok kati provincial chief military attorney, Munawar Shah tanü injang agi kasetba osang ka Baghlan province police lenisang’er otongdar, Jawed Basharat-i metetdaktsüogo.

“Tanü amakertemi Basharat tekolak nung injang kalokja Baghlan province yimtiba, Puli Khumri nung tepsetba osang jangjaogo,” ta pai ashi.

Ajisüaka, tanü amakertemji shirnok iba osang tang tashi mejangjateti aliba olen ka Basharat-i metetdaktsüogo.