Afghanistan-i US mitkar 3,500 yoksemtsü

Washington, September 07 (Agencies): Afghanistan-i US mitkar 3,500 yoksemtsü aser iba rara agi raksatsür aliba linük nung US indang mitkar 14,500 akümtsü, ta defence ketdangser ajanga ashi.

Afghanistan-i mitkar tali yoksemtsü temelaba ya Defence secretary Jim Mattis-i temelaba agütsüogo aser iba sentong ya Tir Donald Trump indang Afghan policy nung aliba maparen ka lir, aser item US mitkartem ya kodang meyiba arutsüar mapang lateta mali, ta defence department indang ketdangseri Bodhbarnü ashi.

America nunger indang rara talangtiba tembangtsü asoshi Afghanistan nungi US indang mitkartem ya yakta agientsü, ta Trump-i taoba ita shia liasü.

Afghanistan-i mitkar 3,500 tali yoksemtsü asoshi Mattis-i temelaba agütsüogo, ta tenüng temai madokdaktsünüsang ketdangseri ashi.

Afghanistan nung tamalen yoka aliba mitkar 8,400 ya 11,000 kümdaktsütsü, ta Pentagon-i taoba hopta jembi. Iba linüki mitkar tali yoksemtsü asoshi zülubanglu ajunga renemogo, ta Mattis-i Hokulbarnü shia liasü, saka mitkar kwi yoktsüar meshisem.

Afghan aser North Korea atema sentong tasen kar Mattis aser Secretary of State Rex Tillerson nati Congress nung metetdaktsüba asülen item mitkartem ya yoksemtsü lemtet.

Tena den Joint Chief of Staff, General Joseph Dunford aser National Intelligence director, Dan Coats na densema iba sentong ya renem.

“Afghanistan nung US mitkar aliba ya national security interests, mitkar lenirtemi ashiba aser iba tesem nung aliba tensa dak ajemdaker alitsü. Afghanistan ya kiralongra mapa angazükdak tesem ka tanaben mekümdaktsütsü,” ta Senator Todd Young-i ashi.

Afghanistan aser Pakistan nung senotsü indoktsü renema aliba angadangtsü asoshi September 13 nung Congressional hearing alitsü, ta House Foreign Affairs Committee ajanga Bodhbarnü metetdaktsü.

Bureau of South & Central Asian Affairs nung acting assistant secretary, Alice G Wells-i iba osang ya Congressional Committee matsüngdang sangoktsütsü.