Afghanistan: Nisung 27 pokset; 40 shi yiru

Taliban telungpurtemi Kabul yimtiba anülulentip tsütsülen bomb lendong tesashi ka atalokdaktsüba sülen Afghan mitkartem lendong atalokdak bushisüngdangba noksa nung angur. (Kabul, June 30)

Kabul, June 30 (Agencies): Piesasa pokseta asütsü mulungteter Taliban telungpur anati pei temang nung alenokba bomb pokdakja Kabul anülulentip tsütsülen lendong tesashi ka tanü, Brehostibar nü atalokdaktsüogo.
Kidangsüa tentetba Wardak province nung police züngsem akümtsü terenemshiba tembanga agir aser parnok nem terenemshiba agütsürtem aniba bus gari ishika densemba gari convoy anasa tanü bomb lendongji atalokdaktsüba osang jangjaogo.
“Tanü lendong nung tajemba agi nisung 27 shi poksetba aser nisung 40 shi yiruba osang tang tashi nung jangjaogo,” ta Afghanisan Interior Ministry-ia osang jangjashitsü.
“Tanü lendongji ozü züngsemtemi atalokdaktsü,” ta shia, Taliban telok otongdar, Zabihullah Mujahid-i tanü lendong atalokdaktsüba atema tenüng agia metetdaktsü.
Afghanistan nungi Taliban telok takok ngua küm 15 tejaklen makdokba sülen par sorkar maneni nungita yaritsü mesüra meyaritsü telemtetba agitsü asoshi North Atlantic Treaty Organization (NATO)-i  Poland kübok Warsaw nung senden amentsü hopta ka jakdang Kabul nung tan lendongji ataloker lir.
“Tan Kabul nung lendong atalokdaktsübaji meimchir temeten anema inyakba tesembatsü maparen lir,” ta shia, Afghanistan Tir, Ashraf Ghani-i tanü lendong atalokdaktsüba atema aitsüba olen ka metetdaktsüogo.
“Muslim nisungtemi tan May ita tepiyong sarasadema pei taküm meshiteta Ramadan lumitsüren sentong agidang, Taliban teloki tai maketertem tepseta lendong atalokdaktsüba ajanga tensa mejungi kümdaktsür,” ta shia, Afghanistan nung tentetba NATO’er Resolute Support Mission-ia tan lendong atalokdaktsüba atema aitsüba olen ka metetdakja liasü.