Afghanistan nüjiso ngur küm 98 jungmung mungogo

Kabul, August 19 (Agencies) : Honibarnü Afghanistan linük nüjiso ngur küm 98 jungnung nung Tir Ashraf Ghani-a official sentong nung dena pai ‘Minaret of Independence’ nung naro yuja liasü.
Sorkar tenzükertem aser taoba mapang Tir Hamid Karzai nata iba naro yutsüba sentong nungji aden. Tesüiba küm 98 tejakdang Afghanistan nung Chuba Amanullah Khan aliba mapang par linük Great Britain nunger yimsüsüba nungi nüjiso angu.
Linük nüjiso ngur küm 98 ajungba anogomung amungtsü asoshi nüburtem temeten asoshi inyakertem aser Herat province nung alirtemi Ghan-i aniba sorkar aser security tem nüngitba temaitsü sayua sentong balaka ayonga munga liasü.
Afghanistan linük nüjiso aser yimjung asoshi bendanga agüja inyaker nüngtugu lenir balalatem noksa aser Afghanistan wako Herat yimti nung lunga inoka yur iba benjung amung.
“Herat yimti nung alitertemi taküm küm nüjiso anogomung tesüba kümtem dang nungi khenyongi balaka amungtsü aser parnoki iba anogomung ajanga Afghanistan linük aser alima nem yimjung osang prokoktsütsü tebilemba nung sentong renem,” ta commission nung züngsem Sayed Khalil Qetali-i osangbenertem dang ashi.
Pai ashiba agi, Herat nung alirtemji kanga dang telungjem aser parnoki Afghan National Defense aser security Forces tem nungiter.
“Ibai linük asoshi tongtibangtiba anogo aser iba anogo nung linük rangben ajungmesor. Onoki iba anogo ya ozü lenirtemi takok ngutetba mapatem asoshi akümtsübu agüja amunger,” ta Herat yimti nung alir, nüburtem asoshi bendanga agüja inyaker Faisal Seddiqi-i ashi.
Afghanistan linük nüjiso anguba anogomung nung linük yimtiba aser province balala nung sentong tajung yanglua munga liasü.