Afghanistan nung 3 pokset, 18 shi yiru

Kabul, August 22 (Agencies): Peisasa pokseta asütsü mulungteter kati pa temang nung alenokba bomb Afghanistan yimtiba, Kabul nung jajaba bendanger gari convoy ka anasa pokdakja tanü lendong atalokdaktsüogo ta police-i metetdaktsü.
“Kabul kübok Macrorayan kiyong nung tentetba Shinozada mozüki anasa atalokba lendong nung nisung 3 asüba aser ishiba agi nisung 18 shi yiruba osang tang tashi nung jangjaogo,” ta Afghan health ministry otongdar, Wahidullah Mayar-i osang jangjashitsü.
“Tanü lendong atalokdaktsüba ajanga anasa anena aliba nübur gari 10 dak tema kanga mejungi poksatsüba osanga jangjaogo,” ta Interior Ministry otongdar, Najib Danish-ia metetdaktsü.
Tanü lendong atalokdaktsüba asoshi shingaia tang tashi nung tenüng agia mali saka US aser NATO mitkartemi Afghanistan toktsüba sülen Taliban telungpurtemi tanü amala lendong balala kanga sashia atalokdaktsütsü tenzükba yong tanü lendongji par telok mapasa asütsü akok ta ketdangsertemi temulung malemba olen ka metetdaktsüogo.