Afghanistan nung nisung 10 pokset, 4 shi yiru

Kabul, May 25 (Agencies): Peisasa pokseta asütsü mulungteter kati pa temang nung alenokba bomb pokdakja Afghanistan yimtiba, Kabul tezülen lendong tesashi ka tanü, Bodbar nü atalokdaktsüba osang ka ketdangsertemi metetdaktsüogo.

“Tanü lendong atalokdaktsüsangi Kabul yimti anülulentip tsütsülen tentetba okadak inyakertem aniba bus ka nung tanü lendongji atalokdaktsü aser iba lendong nung nisung 10 pokset aser nisung 4 tashi yirutsü,” ta Afghanistan interior ministry otongdar kati osang jangjashitsü.

Tanü lendongji par züngsemi atalokdaktsü ta shia, Taliban teloki tanü lendong atalokdaktsüba atema tenüng agia metetdaktsüogo.

US mitkartemi nisung memeni anüng nung yimdaktsüba drone tayimtsü ka amshia Taliban telok lenisang, Mullah Akhtar Mansour taoba hopta tepsetba sülen pa melenzüka, lenisang tasen shimba osang alima dang sangoktsüba anogo nung par teloki tan lendongji atalokdaktsür lir.

“Afghanistan sorkari tasüba temerenshi agüja alir Taliban züngsem 6 tashi tan May ita tepseta merenshitsü obendang agütsüba kepzüktsü nükjidong nung tanü okadak inyakertemji tepset. Ozü teloki tarutsü mapanga tan amala lendong maneni atalodaktsütsü sentong lir,” ta Taliban telok otongdar, Zabihullah Mujahid-i metetdaktsü.

Taliban teloki par amaktsü maparen tanaben inyaktsü tenzüka, taoba hopta tsüngda nung nisung 64 shi Kabul kübok tesem balala nung tepsetba sülen tepuokdak yua alir Taliban züngsem 6-ji tepseta merenshitsü asoshi Afghanistan Tir, Ashraf Ghani-i lemteta liasü.

You must be logged in to post a comment Login