Afghanistan nung opium molozükbaren 48% küma ajemogo: UN

United Nations, October 14 (Agencies): Afghanistan nung taküm 2015 küm tenzüker tanü tashi nung temesepba opium molozükba maparen noklang nung shilem 48 küma ajema akümba osang ka United Nations Office on Drugs & Crime (UNODC)-i tanü Bodbar nü metetdaktsüogo.

“Afghanistan-i opium seret ton 6,4000 tashi yaküm 2014 molozük saka takümbo shilem 48 agi ajema küma opium seret ton 3,300 dang molozükba osang bushitetogo,” ta UNODC ketdangser, Andrey Avetisyan-i tanü metetdaktsü.

Afghanistan’er yimsüsür o ozüng yanglur aser police na tsüngda amalitep tajung aliba ajanga par linük nung opium molozükba maparen ajema akümba osang bushitet ta pai ashi.

Paisa ashiba agi, Afghanistan anüdoklentip tsütsülen tesem kar nungbo police aser mitkartemi par mapa junga meinyakba yong opium molozükba poppy alu tuluba ayimba osang bushitet saka Afghanistan linük ajunga shilem nungbo poppylu ayimbaren shilem 19 agi taküm tajemba akümba osang bushiteta lir.

Afghanistan nung poppylu tulutiba ayimbaji Helmand province aliba osang bushitetogo saka idakjia poppylu ayimbaren takümbo shilem 16 agi tajemba akümba osang bushitet.

Ano, Kandahar, Kapisa, Zabul, Farah, Nimoroz, Herat, Nangarhar, Laghman aser Badkhashan province nunger nunga poppylu ayimbaren taküm tajemba akümba osang bushiteta liasü.

Afghanistan nung ozüng alema mozümora achiba aser kasaji shibelenbaren khuret tulu adoka lir saka alima linüktem nungi teyari agia inyakba ajanga Afghanistan sorkari iba khuret madak takok ngutettsü ta Avetisyan-i metetdaktsü.

“Afghanistan nung ozüng alema mozümora achiba aser shibelenba khuret lir saka taküm 2015 küm tenzüker tanü tashi nung poppylu ayimba aser opium molozükba maparen ajema inyakba kuli bushitetogo,” ta pai nenshia ashi.

Ano, Afghanistan-i ajurua aliba ozüng alema mozü mora achiba aser kasaji shibelenba maparen meshi meshia samatsütsü asoshi alima linüktemi Afghanistan sorkar den yaritepa inyaktsü tajungshiba olen ka pai metetdakja laisü.

Alima ajunga nung ozüng alema opium molozükba maparen shilem noklang nung shilem 80-bo Afghanistan nung inyakba osang bushiteta lir.

Ano, opium molozüka yokshiba ajanga bendenba senotsü amshia Taliban teloki par kiralongrartsü maparen takok ngua inyakba osanga bushitetogo.

Afghanistan nung ozüng alema mozü mora shibelenba maparen nokdangtsü nükjidong nung US sorkaria 2001 küm nung tenzüka tanü tashi nung dollar sen billion 7.6 tashi indokba osang bushiteta lir.