Afghanistan nung Taliban teloki nisung 21 shi tepset

Kabul, Tsüklai/Feb. 05 (Agencies): Moscow nung Afghan ketdangsertem den yimjung ken o jembi tenzükaka Afghanistan nung Taliban teloki lendong balala agütsüba nung nisung tajemba agi 21 tepset.
Northern Baghlan province kübok checkpoint kati item telungpurtema ita amakdang police 11 taküm samatsü, ta iba province ketdangsertemi Mongulbarnü ashi.
Afghanistan taoba tir Hamid Karzai, opposition lennir aser tribal lennirtem dena Afghan nunger nübu tejangjatem den Taliban ketdangsertem senden amenba mapang iba lendong agütsüba osang ya angashir. Iba senden nung Kabul sorkar ketdangsertem kata dena mali.
Checkpoint amakba lendong nung Taliban teloki iba province indang Baghlani Markazi district nung aliba police tem dang Hombar aonung tenük yoker ghonda ana jungnüa khatepa liasü, ta provincial council tekolakba, Safder Mohsini-i ashi.
Iba lendong nung police pongu yirutsü aser sepaitem tali yokba arua matongdang Taliban teloki checkpoint nung aliba prangbong aser injang ajunga auyar ao, ta pai ashi.
“Parnok menur arua rara aser checkpoint ya azüoktet,” ta paisa ashi.
Hombarnep Taliban teloki northern Samangan province kübok yimtsüng ka nung sorkar busemba militia telok ka dak tenük yoker amak, aser iba lendong nung tetsür ka densema nisung ter tepset, ta provincial governor indang odongtar, Sediq Azizi-i ashi.
Samangana province kübok Dara-I Suf district nung atalokba lendong nungya nisung pezü yirua liasü, ta pai ashi.
Azizi-i ashiba agi, Taliban teloki tetsür aser tanur dena yimdaklir dak amak. Iba tesem ya meta talang nung lir asünung yimtaklirtem ya telungpur nungi kümzüktsü mechi parnok indang militia lir.
Lendong anaprong ya Taliban teloki agütsü, ta par sasa kibur küma sangdongogo.
Russia yimtiba nung anogo ana tashi Taliban aser Afghan opposition telok tsüngta senden akaba ya küm 17 raraba tebilemtsü ajema akümtsü asoshi mera tasen ka agiba lir.
Saka iba senden nung Afghan Tir Ashraf Ghani’er sorkar mejaok, kechiaser Taliban teloki par sorkar ya US-i ashiba angartem ta züngshir.
Taoba ita Qatar yimtiba Doha nung Taliban aser US tsüngta anogo trok senden amenba mapang nunga pa maden.
Moscow senden nung adenertem rongnung taoba national security adviser Haneef Atmar dena lir, shiba July nung tir election agitsü aliba nung Ghani den tokteptsü lir.
Maneni Taliban telok ya US den Doha nung February 25 nü yimjung ken o jembitsü renema lir.