Afghanistan nung telungpur 19 tepset

Kabul, January 5 (Agencies) : Afghanistan security force temi mita aoba inyakyim tasen ka tenüka inyakba mapang tajemba agi telungpur 19 tashi tepsetogo, ta Brihostibarnü Defence Ministry sangdong ka ajanga metetdaktsüogo.
Sangdong ajangsa ashiba agi, iba mita aoba maparen ya Bodhbarnü nungi Afghanistan province 34 rongnungi 18 tashi nung tenzükogo.
“Maruf district kübok Kandahar province anüolentip tsütsü mita aoba ka nung Afghanistan air force temi telungpur tesep ka amakdang Taliban telungpur pungu (5) tepset aser gari ana raksatsü, ta sangdong nung shia aliba Xinhua news agency ajanga metetdaktsü.
Anüolen aliba Nimroz province aser Helmand province anüolentip tsütsü na sendaktepba highway meshitettsü atema mita aoba mapang bendanger ana dena telungpur 10 tepset aser toku yirutsü, ta sangdong ajangsa ashi.
Kasa sangdong ajanga ashiba agi, iba tesem nung security force temi landmine aser Improvised Explosive Devices (IEDs) 20 tashi nguteta mepoktettsüsa raksatsü.
Kandahar kübok Maywand district nung Afghanistan army commando temi telungpur mitsa ka meshi meshia samatsü aser iba den külemi prangpong o injang aika bena aru, ta sangdong nungji shia lir. Tanga tasüba temji ano tatalokba balala nung asü.
Iba sangdong nung army tem yiruba mesüra asüba osangbo kecha shia mali.
Ajisüaka Jalalabad nung tanga tatalokba ka nung IED ka apokdang army ka den iba tesem nung aliba nisung ka dena asü.