Afghanistan nungi US mitkartem anitettsü sentong melenshir: Obama

Washington, October 15 (Agencies): Afghanistan nung yutsüba US mitkartem anitettsü sentong melenshiba osang ka US Tir, Barack Obama-i tanü Brehostibar nü metetdaktsüogo.

US-i Afghanistan nung yutsüba mitkar züngsem ajunga sangküm 2016 küm tashi nungbo anitetadoktsü asoshi mezüngbo sentong renema liasü saka iba maparenji melenshia par mitkartem Afghanistan nungi anittetsü mapangji atsünglangshitsü asoshi tan lemteter lir.

“Tang Afghanistan nung ozü mitkar züngsem 9,800 tashi yuja lir aser mezüng renemba sentong melenshia parnok taruba 2016 küm tatem tashi maneni yutsütsü lemtetogo. Ano, 2017 küm tetenzüklen nungi tenzüka mitkar züngsemtemji tajemba küma parnok 5,500 tashi Afghanistan nung maneni yutsütsü renemogo,” ta Obama-i tanü ashi.

Kabul yimtiba nung tentetba US embassy nung mitkar züngsem 1000 tashi yutsütsü dak alaka taruba 2016 küm tatem tashi nungbo Afghanistan nung yutsüba mitkar züngsem ajunga anitetadoktsü asoshi Obama-i yaküm 2014 küm nangzüka liasü.

Taliban telungpurtemi Afghan mitkar ket nungi par linük anüdoklentip tsütsü tentetba Kunduz yimti agiba sülen Afghan lenirtem, White House, US mitkar lenirtem aser US Defense Department lenirtemi ita ishika olemtepa aruba sülen tan telemtetbaji agiba osang jangjaogo.

Ano, 2017 küm tetenzüklen nungi tenzüka Afghanistan nung maneni yutsütsü renemba mitkar züngsem 5,500-ji Kabul, Bagram, Jalalabad aser Kandahar nunger nung yutsütsü renemba osanga jangjaogo.

Aji oda, parnoki Afghan mitkartem nem Taliban aser al-Qaeda telok anema takok ngua raratsü terenemshibaren maneni agütsütsü sentonga renema lir.