Afghanistan operation nung telupur 42 tepset

Kabul, October 18 (Agencies): Afghanistan nung sepaitem operation aodang ghonda 24 tsüngda nung telungpur 42 tashi tepsetogo, ta linük defence ministry sangdong ka ajanga Deobar nü metetdaktsü.
Xinhua news agency-i, “Telungpur ajak agi parnok 42 tashi taküm samatsüogo, 31 yirua lir aser ana sepaitemi pua lir. Police aser intelligence agency nung züngsemtem lokteper province balala nung ghonda 24 tsüngda operation aika oa liasü,” ta ashiba ministry ajanga metetdaktsü.
Iba mita oa operation agiba mapang security temi raradang amshiba oset aika nguteta lir aser ali nung rema yutsüba tapoktsü aika mapoktsüsa petdanga yutsüogo, ta kasa sangdong ajanga metetdaktsü.
Sangdong ajangasa ashiba agi, iba operation nung sepai-a parnok pongu taküm samaogo.
Afghanistan nung Taliban-i anir maneni raradar, ajisüaka North Atlantic Treaty Organization (NATO)-i January 1 nü nungi nungita tashi agütsüba dak ajemdaker linük nung aliba sepaitemi item telungpur meshimeshi samatsütsü asoshi maneni mapa inyaker.