Afghanistan tensa (situation) atema

– Talitemjen Imchen.

Alima ajonga coronavirus wara tepilemtsü nung dang rangloker aruba mapang ka, tanü Afghanistan linük nung tepilemtsü tulu adoka lir. Osang palalatem angashiba aser video anguba nungji, par lima ji tetsürentsü ka dang lir. Tanü tensa palaka yashi palaka aser asüng kechi tensa ajurutsü meshitettsüsa tensa. Alima ajongai tsüpoba kaji, channel palala osangji tepang agi dangbo rasaa ashitsü makokba tensa tamajung. Ano ibaji dang masü, channel palala osang dang nungi talila tensaji tamajungba alitsü tsüpoloker. Kechiaser parnoki memelongba videobo alima dang meperokdaktsünüi alitsü. Iba ama tensa tamajung ka nung, nisung aika tatem anüko ji ya asütsü asü ta takümtem ji nokdaka alitsü.
Khen ashitsübo, nokonü amertem jibo, shibai tama ngushia kaloktsüdir item ji maongka ta bilema aliba nepotem lir. Aser parnok arangshi (traning) yimyajia yamaji. Saka temeimtsüka anüngnozatem nokonü maben rishikangshibatem ji asen tenük-i video ajanga angur. Anüko shia anüngnozatem rishikangshiba video palala ajanga angudang, asenok tenük nung nüksü makonger.
Tanü Afghanistan nung alirtem, shir telok shidak aser shir telok tai asenoki memetet, saka aseni amangba Tsüngrem-ibo meteta lir. Kodaser alima ajonga asoshi tansütsü agitsüsa Afghanistan nungang adoker, Tsüngrem-i dang metet. Naga nunger ajongai kipok nung aser telok palala nung Afghanistan atema sarasadema alitsü. Aser aji Tsüngrem-i angashir alitsü.
Alima dang asü nung, ABAM mesüra NBCC amala telok tentet tuluba agi sarasadem aben nungbo parnok asoshi kanga tajangzük angutsü ama pilemer. Asenoki tsüngtong oa Afghanistan nung alirtem ji meyaritetaka, asenok sarasadem ola youtube ajanga angashidang, Afghanistan lima tasüaküm (survival) tensa nung nokdaka alirtem asoshi anisüngzük tulu asütsü. Alima sobaliba ozüng nung taküm kümzüka alitsüba ji kanga tongtipang. Christian tamanger ka asoshibo tanela kümzüka kodaki aotsübaji tongtipangba.