Afghanistan:Kiralongrari teti amakba agi kanga jashir

Kabul, February 09 (Agencies) : Afghanistan nung kiralongrartemi teti maka lendong agütsüba agi parnok kanga jashir. Balakata linük yimtiba Kabul nung taküm bendanga agütsür pei mang nung tapoktsü tesashi alenloker pokdakja lendong agütsüba agi nüburtem kanga mepelar aser linük nung telungpur mita nokdangba mapa nung sorkari tamakok nguogo ta aitsüba Brihostibarnü osangbenertemi ashi.
Mongulbarnü Supreme Court kima nung kiralongrartemi tesüsa buba lendong agütsüba mapang tajemba agi civilian nisung 20 asü aser nisung 40 dak tema yiru.
“Kiralongrartemi tai maketba nüburtem tepsetba ajanga linük nung temelenshi marutsü,” ta Brihostibarnü Kabul nung alir Mohammad Haroon-i kiralongrartem aija ashiba osangbenertemi ashi.
Sorkari telungpur tsbudaktsütsü asoshi kiralongrartem nem temerenshi agüja aser lokti jakdang alenseta südaktsüba ajanga kiralongraba nokdangtettsü amai Harron-i bilemer.
Afghanistan Tir Mohammad Ashraf Ghani, United Nations, European Union aser linük aika den international lokti jentii Afghanistan indang Supreme court amakbaji “tasü mait mapa” aser iba mapa khu khua aitsür ta metetdaktsüogo.
“Kiralongrartemi teti taküm bendanga agütsür parnok mang nung alenloka aliba tapoktsü tesashi pokdakja nüburtem tepseter aser lenmang tezülen ata lir injang khaloktsür, ajisüaka sorkari item mapatemji aitsür tang toktsür; Taliban, Haqqani network, Al Qaeda aser Islamic State groups den sentaktepa aliba telok nungi nisung jenti tepuokdak lir, saka parnok nem temerenshi magütsür,” ta Kabul nung alir kati kanga jashia ashi.
“Security force temi pua aliba item kiranglongrartemji tepuokdakjisa meyui nüburtem ajak adenshia lia sorkari alenseta südaktsütsüla,” ta paisa ashi.
Kiralongrartem nem ‘capital punishment’ agütsütsü pusemer aser Mongulbarnü teyirur rongnung dena alir ka, arishi küm 24 tain, Tamim-i, “Tang pua aliba kiralongrartem ajak alenseta südakjang,” ta sorkar nem temepishiba ola ka agütsüogo.