Afghanistan:Tongtibang Al Qaeda lenir ka tepsetogo

Washington, March 26 (Agencies) : Anaben tashi Pakistan kanga mejungi amakba nung tongti shilem agisang, Al Qaeda lenir tejen ka US nunger kiralongrar den raraba teloki taoba hopta anüng nungi tayimtsü agi amakdang tepsetogo, ta Pentagon sangdong ka ajanga metetdaktsü.
US-i March 19, 2017 nü Paktika province amakba mapang pa tepset, ta Honibarnü metetdaktsüba sangdong nungji shia lir.
2008 küm September ita Islamabad nung aliba Marriott Hotel amakdang nisung 54 tashi tepsetbaji Qari Yasin sentong liasü. Item tasürtem rongnungji US military nungi US Air Force Major Rodolfo I. Rodriguez aser US Navy cryptologic technician Third Class Petty Officer Matthew J. O’Bryan na densema liasü.
Ano 2009 küm March ita nunga Lahore nung Sri Lanka cricket team amaktsü nükjidong nung amakdang Pakistan police trok aser civilian ana tepsetbajia Qari Yasin mapasa liasü.
“Islam tenüng menükja aser tai maketba nüburtem akoksatsübaji ozüng dang nungi mejenbutsü ta Qari Yasin tepsetba ajanga jangja jangja sayur,” ta Defense Secretary James Mattis-i ashiba Pentagon sangdong nungji shia lir.
Yasin ya Balochistan, Pakistan nungi aser pa Pakistan nung amenoka aliba Tehrik-e Taliban den sendaktepa liasü.