Africa: Muslim nunger lima nung Yisu indang jembir

Yimpoksüi/November 26, 2018 (Agencies): Africa linüktem nung Islam yimsü akhanga amshirtem tali züinba ya tebilemtsü tulu lir. Saka Muslim nunger timba süa aliba linük nung nüburtemi Yisu indang tali metetnür. World Missionary Press nungi Helen Williams-i ashiba agi, Tanüla Temeshi kishi lapoker aser arogo-i agizüker. Muslim nunger lima nung Tsüngremi tesüngmangtsü mapa inyaker.
Senegal nung aliba nütsüng shilem 91 Muslim nungertem lir, ta Operation World ajanga ashir. Saka Muslim nunger nütsüng million 12 jungnüa aliba linük nungya Osangtajung asoshi kishi shibanga mali, kong Khristanpuri ki ka nungi ki kati Yisu indang jembia aodang parnok ajungmesor.
Yisu sülen anidakertemi nüburtem ajurua parnok otsü angatsü, parnok nüngdakba metettsü aser parnok mulung tendanga jajadang kechiserna ajak melener, ta Mission Network News nungi Julie Bourdon-i ashi.
Senegal nung Khristan yimsü dak sendakba oset balala lemtsür rongnung World Missionary Press ajanga tongti shilem agir. Iba kasa telok ajanga ki ka nungi ki kati oa Osangtajung lemsateper, moapu nunga evangelism mapa inyaker, yimtong nung film sayur aser parnoki Yisu indang film ajanga temelenshi aruba nguogo.
Senegal nung tang Tasen Lai 40,000 lema agütsütsü atateper, ta Williams-i ashi. Khristan mapa inyakertemi ki sema Laishiba aser iba amala kakettem lema agütsür aser Yisu indang jembia jajar.
Lai ashiba agi, “Muslim nungertemi Tasen Lai agizüker. Anungji item oset lema agütsürtemi Laishiba ya French oshi nung 20,000 aser Arabic oshi nung 20,000 meshir. Aser Tasen Lai meshir timba akümba nguogo.”
Ano maneni item osettem lema agütsürtemi World Missionary Press dang Muslim nungertem aliba tesem nung Tsüngrem mapa inyaktsü tejangraba aliba shiogo.
Item linüktem nung aliba ya Muslim nunger ka amai züngshir, saka parnok ya tamangba yimsü nung masü saka sobaliba aser taküm libaliru nung Muslim nunger amai alir. Anungji Muslim nunger aikati parnok tamang tema nung sadema jembitsü mulunga lir.
Saka parnok anema nokdaker lir aser timtem ajurur.
World Missionary Press ket nung Tasen Lai Arabic oshi nung züluba lir aser French oshi züluba terenemer. Saka Africa nung Tsüngrem O ya Senegal kisüng masü saka linük aikati nüngdaker.
“Onoki Nigeria dangi rong sünga Laishiba yokaka ita ishika dang lir ano tali yokang ta ashir,” ta Williams-i ashi.
Nigeria nung Muslim nungertem ya timba north tsütsü lir, aser yangi kiralongra mapa jenti ataloker aser Boko Haram ana telungpurtemia timtem agütsür.
Iba tesem nung Hausa nungera ishika dang evangelical Khristan lir, ta Joshua Project-i ashi.
Kasaji Ethiopia nunga Tasen Lai aser Laishiba nungi agizüka züluba kakettem nüngdaker, kong Khristan telok ka Osangtajung proktsü asoshi mapa meranga inyaker.
“Ethiopia nung parnok aliba tesem nungi Somalia, Djibouti aser Eritrea linüktem atongtsü meranger, kechiaser item linük dangi Laishiba aser danga osettem indang indanga aotsü tasak lir,” ta Williams-i ashi.
Item linüktem nung lenmang sadema lapoktsü asoshi mapang talangka nungi sarasademertem asoshi osang tajung lir.
“Iba tesem nung asendenshi ka lir, arogo nung inyaktsü mulungba asendenshi. Tanülar kishi lapokba aser nisung mulungjang lapokba asendenshi ka lir. Anungji ibai jangratemtsü mapang ka lir, anungji asenoki tasü aittsü asoshi sarasademtsüla, len anitsü asoshi aser temoatsü asoshi sarasademtsüla,” ta laisa ashi.
World Missionary Press asoshi ibai maongka tajung ka lir, ta ashi.