Africa nem sen billion 30 agütsütsü nangzüker: Abe

Kenya yimtiba, Nairobi nung amenba 6 buba Tokyo International Conference on African Development (TICAD) senden nung Japan Ato Kilonser, Shinzo Abe (Abelen)-i African Union (AU) mendenbuba aser Chad Tir, Idriss Deby den ajurutepdang agiba noksa ka yangi angur. (Nairobi, August 27)

Nairobi, August 27 (Agencies): Japan linüki taruba küm 3 tsüngda nung teyari sen, dollar sen  billion 30 tashi Africa nem agütsütsü tenangzükba olen ka Japan Ato Kilonser, Shinzo Abe-i tanü, Honibar nü sangoktsüogo.
Africa nung public aser private sector napronglai tenzükba ki o jen yanglutsüren, kaketshisatsü bushitsüren aser temang anepalutsüren sabangtem nung terenelok lidaktsütsü nükjidong nung Abe-i tan teyari sen agütsütsü tenangzükbaji Africa lenirtem dang metetdaktsüogo.
Ali nungi adokba rongsen ajema anguba Japan linüki Africa continent den tesendaktep tajung yanglua, par continent anguba rongsen nungi tajangzük angutsü alizüng yua lir.
Kenya yimtiba, Nairobi nung amenba 6 buba Tokyo International Conference on African Development (TICAD) senden nung Abe-i tan Africa nem teyari agütsütsü tenangzükba olenji sangoktsü.
“Japan aser Africa nati aroki lungjemer arok terenlok alitsü nükjidong nung ozü linüki Africa nem nungdakba teyari sen agütsütsü renemer lir,” ta Africa kübok tentetba linük aser sorkar lenir 30 dak temai shilem agiba  senden nung Abe-i metetdaktsü.
Tan teyari sen billion 30 agütsütsü nangzükba jakdang, 2013 küm amenba TICAD senden nunga Japan-i küm 5 tsüngda nung Africa nem dollar sen billion 32 tashi agüja yaritsü nangzüka liasü.
Abe-isa ashiba agi, taoba mapang agütsütsü nangzükba teyari sen noklang nung shilem 67 shi agüja Africa nung terenlok mapatong jenti inyaktsü tenzükogo.
Japan linüki 2014 küm dollar sen billion 1.5 shi aser 2015 küm sen billion 1.24 tashi Africa nem teyari agütsüba osang bushiteta lir.
Ano külen, Japan densema, Africa nung tentetba linüktemi tawa amenba Kigali senden nung tentetba African Fund Against Terrorism nem teyari sen agüja nungitsü tayongzükba olen ka Chad Tir aser African Union (AU) mendenbuba, Idriss Deby-ia tanü senden nung sangoktsüogo.