Africa nem teyari sen billion 60 agütsütsü nangzüker: Xi

Johannesburg, December 04 (Agencies): Africa nung nungdakba terenlok maparen inyaktsü nung yariteptsü nükjidong nung China-i Africa nem teyari sen dollar sen billion 60 agütsütsü tenangzükba olen ka China Tir, Xi Jinping-i tanü Hokolbar nü metetdaktsüogo.

South Africa kübok Johannesburg yimti nung tanü nungi tenzüka amenba Forum of China-Africa Cooperation (FOCAC) Summit senden nung o jembia shilem agidang Xi-i iba tenangzükba olenji sangoktsü.

Xi-i tan Africa nem teyari sen agüja yaritsü nangzükba ajanga par China o Africa na tsüngda tesendaktep junga aliba kuli angur.

“Africa ya Africa nüburtem meyong lir aser Africa-i ajurushiba ken o ajunga Africa nüburtemi bentettsüla,” ta shia, par China-i Africa’er ken o nung teka amoka memeintsü asoshi Xi-isa tanü nangzüka liasü.

China-i Africa nung tongpang raraba aser nüburtem indang temeten anema inyakba ajunga mangur ama yutsür par shishilembabaren tajangzük bushir ta West-i China aija lir.

Ajisüaka, “Tesüiba mapang Africa madak yimsü asüba linüktemi inyaktsü mapa ajunga China-i Africa nung inyaktsü tenzükogo,” ta shia, African Union (AU) nung mendenbuba, Zimbabwe lenisang, Robert Mugabe-ia tanü metetdaktsüogo.

Xi-i tan Mongolbar nü Zimbabwe semdangdang Mugabe-i aniba Zimbabwe sorkaria China den rongsenren tezüngzüktep ishika agiba osang angazükogo.

Tir Xi-i tan agütsütsü nangzükba teyari sen billion 60 nungi sen billion 5 tashi interest magi agütsütsü aser tanüngba teyari senji tajemba interest agia agütsütsü asoshi renema lir.

Teyari sen agütsüba den külemi, China-ia Africa nung ki o jen renemtsütsü, aluyimtsüren jenjang tajungba küma temalen ajungkettsütsü aser par continent nung sensaka alibaren ajemtsütsü alizünga yua lir.

Taoba 2014 küm kija nung China-i Africa den dollar sen billion 220 shi jenjang aketba shishilembabaren inyaka Africa den shishilemtepba linük tuluba kümogo.