Africa nung nisung million 14-i chiyongtsü peria mangur: UN

Malawi linük nung yimti tulutiba, Blantyre nungi anüdoklentip tsütsüleni kilometer 60 shi pilar Zomba Central Hospital nung tentetba chiyongtsü agütsüdak Malawia tanurtemi pei tetsütem den aroki chiyongtsü lemzüktsütsü asoshi ata aliba noksa nung angur. (Blantyre, January 18)

 Johannesburg, January 18 (Agencies): Africa anülulentip tsütsülen alir nisung million 14 shi chiyongtsü peria mongui ayawara tia nung aliba osang ka United Nations kübok World Food Programme (WFP)-i tanü Hombar nü metetdaktsüogo.

El Nino-i alima tsüngsang mupong melenshitsüba ajanga Africa anülulentip tsütsülen densemba tesemtem nung tajemtsü tzüa peria mongui akümba osang ka par teloki metetdaktsü.

“Tan timtem tesashitibaji Malawi linük nütsüng yongsük noklang nung shilem 16 shi, nisung million 2.8-i ajurushia lir,” ta   WFP-i ashi.

Malawi sülen anidaka, Indian Ocean nung densemba asetkong, Madagascar nung alir nisung million 1.9 shia iba timtem tulu ajurushiba osang bushitetogo ta WFP-i shisem.

Par telokisa ashiba agi, Zimbabwe nunga par nütsüng yongsük noklang nung shilem 10 shi, nisung million 1.5 shi ayawara tia ajurua lir.

“Tzünglu peria mesüra kenyongi maruba ajanga alu aser iba amala tsünütsüpongtsü maparen meinyakteti aliba osanga bushiteta lir,” ta WFP-i tebilemtsü kaa ashi.

“WFP-i timtem kanga sashia ajurua alirtem nem nungdakba chiyongtsü aser osettsüset agüja yaritsü renema lir saka ozü telok kijaibo tan ajuruba timtem ya mekoktettsü,” ta WFP-i shisem.

Tesüiba mapang, 1904 nung ajuruba sülenbo Africa anülulentip tsütsülen densemba tesemtem yaküm 2015 takongtiba aliba osang bushitetogo.

El Nino-i tsüngsang mupong takong bener arutsüba ajanga Africa anülulentip tsütsülen densemba tesemtem ajunga taküm May ita tashi kanga dang takong alitsü ta tsüngsang mupong tendanger mongintemia metetdaktsüogo.