Africa nunger amaker nem temerenshi agütsütsü: Rijiju

New Delhi, May 30 (Agencies): Tawa Africa nunger kanga amakba mapang ka nung tanü sorkari, item amakbaji nisung bendangshidanga amakba süra temerenshi tulu agütsütsü, ta nangzükogo.
New Delhi nung osangbenertem den jembidang Minister of State for Home, Kiren Rijiju-i, “Item ken o ka nung danga nisung bendanga benshiba kuli ngura temerenshi tulu agütsütsü,” ta ashi.
Tawa Delhi nung Africa nunger amakba tatalokbatemji nisung bendanga benshiba den sentaktepa ali asü ta asüngdangba langzüa minister-i item o jembi.
“Onoki tatalokba ajakji süoki ia agir. Onoki ozüng maparen inyakogo aser nisung karbo puogo,” ta pai metetdaktsü.
Tanü Africa nunger telok kati taxi anishir ka dak azük ta tai tonglokja aliba dak sentakba nung Rijiju-i, peisasa pei kapu nung ozüng amshirtem nem temerenshi agütsütsü, ta ashi.
“Ozüng benoka azüoktsüji onok teinyaktsü khuret. India senso-a süang mesüra bendanger shiba südir süang, peisasa pei kapu nung ozüng amshirtem nem temerenshi tulu agütsütsü,” ta paisa ashi.
Delhi nung Central Africa linük, Congo nungi lanur ka tepsetba densema tesüiba anogo ishika tsüngda Africa nunger kanga makdar. Hyderabad nunga arishi küm 23 tain Nigeria nunger kaketshir kata azük.
Afirca nunger dak azükba ken o dak sentakba nung nisung pongubo puogo.