Africa nungeri Nehru aser Indira mamatok: Gogoi

New Delhi, October 30 (Agencies): Ato kilonser Narendra Modi-i aniba sorkaribo tesüiba mapang Ato kilonser Nehru aser Indira Gandhi nunger sentokogo ta shinüba olen ka nung Hokolbar nü Assam Chief Minister, Tarun Gogoi-i, India-Africa tesentaktep yanglutsüba atema Africa nungeri taoba mapang Ato kilonsertem- Jawaharlal Nehru aser Indira Gandhi ano mamatok, ta ashi.
Sangdong ka ajanga Gogoi-i, “India-i Africa linüktem den tesentaktep yangluba atema Brihostibar nü Modi matsüngdang Africa lenirtemi Nehru aser Gandhi nunger tenüng sangogo,” ta ashi.
New Delhi nung 3buba India-Africa Forum Summit mapang osangbenertem senden ka nung jembidang Assam CM Gogoi-i, “Africa nungeri parnok ya tepela mesayutetba nüburtem masü ta kuli sayuogo,” ta ashi.
“India aser Africa nung aliba linüktem tesentaktep maparen acha ayangsangji Jawaharlal Nehru lir. Mugabe (Zimbabwe Tir)-i Modi jakdang Nehru indang jembi,” ta Gogoi-i ashi.
Brihostibar nü India-Africa Forum Summit nung jembidang African Union nung Co-Chairman, Mugabe-i, merararai British nunger yimsüsüba agientsü atema Africa yarirtemji Mahatma Gandhi aser Nehru nunger lir,” ta ashi.
Paisa, Indian National Congress ya party tajung ka lir, ta metetdaktsü.
South Africa Tir, Jacob Zuma-ia Nehru aser Indira Gandhi nati India-Africa tesentaktep nung tongti shilem agiba indang jembia liasü.
“Tesüiba putu ka puti otsü nung asenok sentaktepdaktsüba nung nenok Ato kilonsertem aser mangdang alir lenir Jawaharlal Nehru aser par jala Indira Gandhi na bilemteter,” ta Zuma-i ashi.
South African Tir-i ashiba agi, Indira Gandhi mezüng küm 11 (1966-77) office nung aliba mapang lai ‘Africa-India Development Cooperation aser Africa liberation atema India-i nungittsü benokba ajanga India nunger African policy nung temelenshi adokdaktsü.
October 26 nungi 29 nü tashi India-Africa Summit nung Africa nung linük 54 nungi Chuba ana densema tekolakpur 41 aser tongti ketdangser aika denogo.