African-American legislator tanubusang ya Khristan Republican lir

Virginia, Aenjeti/Jan. 14 (Agencies): West Virginia State University nung azüngsang Caleb Hanna ya arishi küm 19 nung African American nunger rongnung state legislature tanubusang aküm aser pa ya Khristan Republican ka aser taoba Tir Barack Obama-i ajungmeso ta ashi.
Arishi küm 19 tain Hanna ya taoba Yimpoksüi/November nung West Virginia House of Delegates nung Republican ka ama shimtet, kong career aser technical education nung state sen timba indoker.
“Ni Khristan ka lir aser takokba ya meranga inyakba, tenangzükba aliba aser bendanga agütsüba ajanga yangerteter ta amangba kibong ka nungi ni intet aser iba ajanga tanü tashi kü len anir,” ta pai taoba küm election agitsü anasa Register-Herald nung ashi.
Pai kümsük asem tashi inyaka alisang Webster County Democrat Dana Lynch ya vote 432 agi akok.
Tawa Charleston Gazette – Mail den sensaksemba mapang, pa atema yimten yimsüsüba shisatsü ya Tsüngrem, prangbong aser kinü tanurtem nungi agizük aser pa tamang tsütsü nungi aliba ya repranger, ta shia liasü.
Pa ya Richwood High School nung Khristan lokti Young Life nung kangadang teyakyak nisung ka liasü aser Little Laurel Baptist nung tekülem mapang nung shilem agir ka liasü. Pa ya arogo ka nungi pastor ka jala den medemer.
West Virginia State University nung economics major agir Hanna-i ashiba agi, pai meranga inyakba ajanga nüburtem taküm nung temelenshi tajung arur ta pai amang tashi sorkar tenzükner.
“Ni grade asem nung lia yimten yimsüsüba tsütsü mezüng tejangraba arua liasü. Yangi sempet tajung aketer sentsü tanak nisung ka ya United States tir menden tongtet. Aser nia yamaji inyaktettsü ta bilem,” ta pai Gazette-Mail dang ashi.
Saka pa tebu asüba sülen pai Obama sapuba ajema aküm, ta Hanna-i ashi. Obama indang sentontem ya West Virginia atema majung liasü aser pa vote agütsütsü atema tenüng züluokdang Republican ka ama züluok, ta pai ashi.
Tang pa iba wadang nung mongin ka akümtsü temulung agüja inyaker.
“Ozü state nung kaketshirtem ya küm pezü college degree atema kanga rakteper, kong asenoki technical training tali nüngdaker. Sentsüh bendentsü atema asenoki college nung küm pezü indoktsü menüngdak,” ta pai Gazette-Mail dang ashi.
Hanna ya temesüng nisung timba aliba tesem ka nung temesüng nisung kibong ka nung intet, aser pai ashiba agi, nisung ka sentsü nung ajemdaker mezüngmeshiba tebilemtsü ya America nung liaka Republican party nung nisung ajak asoshi maongka lir, ta Hanna-i ashi.
Pa sentsü dak ajemdaker nisung aikati pa mezüngmeshia aser sensamasa amshiaka pa nükjidong aser pa wadang nung marakzüi nokdak.
“Ni item timtem ya police nem osang agütsü, kechiaser ni yarir kümzüktsü atema ni süoki ia bilem,” ta Hanna-i ashi.
Pai pa sentsü tanak senmang indang ya akhi mapang nungi sentsü tanak aliba West Virginia State University nung tali bushitsü sentong lir. Pai yimten yimsüsüba tsütsü mapa tajung inyakba ngua Morocco nungi professor Dr. Ali Zayati-ia pa nem tenüngsang agütsü.
“Pai kodana class mathir. Asenoki pa ama tekümdang nisung nüngdaker,” ta Zayati-i ashi.
Pai Khristan yimsü nung amangaka medical marijuana amshiba nung tenokdangba malitsüsa ozüng yangluner ta ashi.
Iba ajanga asen state nung saru aika bendentettsü, ta pai ashi.