AFSPA kübok alartem !

Atangji, Nagaland nung nisung tepsetba, tashiyim agi sen saruba aser ashi auyaba mapatem alitsüa akok, ajisüaka item ozüng raksaba mapatem azüoktsü asoshi India sepaitemi pei mulungba nung tashi amshitsüsa Armed Forces (Special Powers) Act alitsü atema ano ita trok apuloktsübaji Naga nunger mezüngmeshiba mapa ka lir. Tanga state asübo rongdak tatar senden jatepa jembila aser lokti tentet ajaki iba ama nübortem tsübudakja amokmerentsü asoshi latetba ozüng benshitsü lemtetba anema ola adokla. Tamasayongi, Armed Forces (Special Powers) Act ya 1958 küm, ano Nagaland state makümdang, Naga nunger yimten nüchiso bushiba mapa nokdangtsü asoshi latetba ozüng ka lir. Naga nunger asoshi tensa mapang tamajungtibaji 1950 sülen India sepai ket nung reshikangshi timtem ajuruba mapangba ya asütsü. Iba mapang India sepaitemi tapi agi temulung melemteti bilemba nisung aika kaseta endokogo aser aika taküm kangshi kangshia lemdatsüogo. Iba mapang India sepaitemi yim rongdoktsüba, alu raksatsüba aser yim pezü pongo külemi anidener yim ka nung mongdakja reshikangshia maksüdaktsüba mapa ajakji  India government-i India sepaitem nem parnok inyaknütsü inyaktsü tashi talila agütsür inyakdaktsüba mapatem liasü. Tanüa kasa sepaitem nem prangpong injang, chiyongtsü aser tajemtsü yi teperi agütsür AFSPA kübok Naga nunger madak tashi amshitsü ozüng agütsübaji tetsübutsüka lir. Iba ozüng kübok yabo sepai tanishir mashi kati temulung melemi bilemba nisung ka khaset nunga mebushitsü, bomb agi kiojen pokdoktsü nunga kecha masü aser mashi mapang ka nung mashi ki ka lapoka bushisüngdangtsüa akok. Iba ama ozüng tamajung ya Naga lima nungi agientsü asoshi akhidang nungi Naga Peoples’ Movement for Human Rights purtemia ola adoka aruogo, aser Supreme court tashi nung ken o benoka lir saka makoker. Iba ozüng yabo ozüng raksartem dang nungibo tai maketba nübortem asoshiang lendong tuluba keta alinung, aiben United Nations senden tashi nung iba ken o ya benoka jembir aser India dang iba ama ozüng ya agientsü asoshi metetdakja lir. 1958 küm nungi iba ozüng ya amshia Naga nunger reshikangshiba, taküm aser rongsen samatsüba aser tetsür tanur tsübudakja maksüdaktsüba tatalokbatemji tanü putu lanurtemia amatsü makok. Itemji temulung ashitsüka lir. Item chirnurtemji tanü putu lanurtem lir. Iba ama ozüng tamajung aser tesashi agi Naga nunger akoktsü asübo koker lila aser Naga yimten nüchiso bushiba rara anentsü asübo anener lila. Ajisüaka, timtemsa timtem agiaka aser tesamasa tesama ajuruaka  Naga nungertemi yimten temeten indang jembiba manenba tetezüji, Naga nunger ya India nunger masü, anungji India ozüng agibo malentettsü ta kuli ka agütsür. India government-i ibaji angatetla sang, tang ano Nagaland nung AFSPA ita trok maneni alitsü ozüng agütsütsü melen yimten telatetba katiang arutsüsa inyakla. India nunger asoshi tang ya Naga nunger ozüng tesashi agi alentsü merangba mapang masütsüla saka tangatettep nung Naga yimten jenjang ka latetba mapang asütsüla.Koba lima nung kechi kin südir süaka, tekolok aser shisatsü shitak ali tashibo senso kati pei lipok aser temeten indang jembi manentsü. Ibaji kin ka senmang lir. David chubai Tsüngrem dang T.Ken 137:5 nung , ” Ni Yirusalem amadokra, kü teka tachiji ashirepdakjang,” ta azüngashia sarasademba olaji senso kati pei temeten aser pei tetsü taso lima meimba ola lir. Iba amaji Naga nungertemi Tsüngrem dang Naga lima aser nübortem ya pi bendanger ozüng tamajung kübok malitsüsa taochi aser tashi meshia maneni sarasadema inyaktsüla. Atangji, tanüa asenok sadoksadoka alitsüsa India temzüng küboksa süaka Article 371 A nung Naga nunger nem temeten aika agüja lir saka timtemji asenoki asenoksasa item ozüngtemji mapa küma mamshitetter. Article 371 A ali tashijibo India küboksa süaka, Nagaland tatar senden nung melatet tashibo, India tatar hoho nung latetba temzüng ozüngi Naga nunger alentsü makok. Ajisüaka, tangbo alendaktsür ! Ibaji asenok tai agi asenok India lar akümba mapa ka asütsü.