AFSPA magien tashi Manipur tsürtemi maneni nokdaktsü nangzük

Imphal, March 09 (Agencies): Assam Rifles sepaitemi arishi küm 32 tain tetsür ka dak tashiyim mapa tamajung inyakba anema Manipur nung tetsürtemi mangsa longkak aiter küm 13 süiogo aser iba ozüng ya magien tashi parnoki maneni nokdaktsü.
2004 küm July 15 nung tetsür tain 12-i Kangla Fort nung Assam Rifle camp anasa süoshi kecha masemi longkak aita liasü. Parnoki ‘Indian Army tem arua onok dak tashiyim agi mapa tamajung inyakang’ ta zülua amer nokdak. Aser iba ajanga linük nung nübur ajunga aoksadaktsü.
Onoki longkak aiter küm 13 süiogo saka metsü tajung keta madang, anungji Armed Forces (Special Poewrs) Act (AFSPA) ya magien tashi onoki maneni nokdaktsü, ta “Mothers of Manipur” ta ajaba teloki metetdaktsü.
“Nisung aikati tashiyim agi mapa tamajung inyakba sülen tepseta yutsüba tetsürtem indang tetsü ka ama onok ajaki bilemer. Manipur nung telungpur tebilemtsü aliba ajanga tetsürtem tia tamajungba kümdaktsür. Telungpurtem aser mitkartemi tetsürtem reshikangshir. Ibaji ajanga onok sasa iba anema nokdaktsü molungtet,” ta arishi küm 66 tain, Gyaneshori-i osangbener dang ashi.
“2004 küm iba longkak onoki aitba ajanga Kangla Fort nungi Assam Rifle tem agien aser Imphal municipal tesem nung constituency 7 nungi dang AFSPA agienogo. Saka State nung tesem ajunga nungi AFSPA ya magien tashi aser tashiyim agi tetsür dak mapa tamajung inyaker aser tiyazü kuli nung nisung tepseter nem temerenshi magütsü tashi onoki raratsü,” ta Haobam Tombi-ia ashi.