AFSPA ozüng reprangshitsü nüngdaker: Lt. Gen Hooda

New Delhi, April 05 (Agencies): Meimchir temeden atema aser telungpur mita aodang sepaitem kümzüka alitsü atema Armed Forces Special Powers Act (AFSPA) reprangshitsü nüngdaker, ta Lt-General DS Hooda (retd)-i metetdaktsü.
2016 küm September ita nung “surgical strikes” aoba mapang nung pa ya Northern Army Command tongti liasü.
“Asen sepaitem kümzükbaren nung AFSPA nung metokmeperi lir, talisa 2016 küm July ita nung Supreme Court-i obendang agütsüba (Distrubed area nung duty mapang tashi tali amshiba atema sepaitem anema bushisüngdangtsü obendang) sülen metokmeperi lir. Iba ozüng reprangshitsü nüngdaker, meyokteptsü mesüra agientsü masü,” ta Hooda-i metetdaktsü.
Lok Sabha election atema tawa Congress party-i manifesto nung AFSPA reprangshitsü nangzükba aser Jammu & Kashmir nung sepaitem yokba reprangshitsü atema nangzükba asoshi BJP-i Congress aitsüba mapang ka nung Hooda-i iba ya jembiogo.
Congress manifesto nung, “Security sepaitem nüngdaktem aser meimchirtem temeden na liromedemtsü atema iba ozüng nung tapet melenshitsü,” ta nangzüka lir.
Hooda-i, pai Congress atema renemtsüba national security strategy (NSS) manifesto ya pai foreign affairs, police aser intelligence atema energy security nung mongintem den asüngdangtepa renem, ta metetdaktsü. Iba nungji AFSPA mesüra J&K nung telungpurtem den raratsü atema sepai kwi nüngdaker, iba indangji shia mali, ta metetdaktsü.
“J&K nung tamasa yimtenren nükjidongtem ataloktsü atema ni benoka lir, iba sülen sepaitemi parnok den jembia asalentong renemtsü akok. Yimtenren aser sepai senteper asalentong renemtsü nüngdak,” ta pai ashi.
Tapak 40 dak tema aliba NSS nung India nunger national security nung tayongzükba onük pongu shia lir, aser itemji: alima yimtenren nung India jenjang, India kidangertem secure asütsü, linük telung nung rara bentettsü, sensotem kümzüktsü aser sepai, police, cyber, space aser border management nüngdaktem peritsütsü indang shia lir.
Hooda-i renemba NSS report ji Congress manifesto nungbo shia mali, kechiyong manifesto sayatsü anogo ana dang lia Congress Tir, Rahul Gandhi nem iba report agütsü.