AFSPA ozüng yabo agientsüla !

Temeimtsüka aser tesasatsüka Maniputsür Irom Chanu Sharmilai Manipur nungi Armed Forces (Special Powers) Act agienang ta takangba agüja  taoba küm 16 tashi tebanglen nungi chiyongtsü kecha meyoki lasasa lumia arur külen tan August 9 nü lumiba anenogo. Atangji, lai lasasa shi nung timtema küm tertrok tashi lumiaka government-i kecha hau ta maliba agi lai lasasa la sentong melenshiogo. Aji oda, tangbo lai lasasa la temang raksaa lumitsü melen la Manipur state election-i aitsü aser chief minister kümer külen Manipur nungi AFSPA ya agientsüsa inyaktsü mulungtetogo. Atangji, küm tertrok tashi lumiaka AFSPA ozüng magientet nungji la mapa nung tamakok angu ama asenoki bilemtsüa akok, ajisüaka lai 2000 küm nungi AFSPA anema raraba tongpang nungi matsüngshii nokdaka lir, anungji ano rara manen. Ashiko, ano tongpangji tangang tesashiba asütsüa akok. Aji oda, taoba küm tertrok tsüngda Manipurtsür kati AFSPA ya meimchir temeten anema latetba tetsübutsü ozüng ka lir, anungji agientsüla ta metetdakja lumiba ajanga alima ajungai asenok ama iba ozüng kübok alirtem India sepaitem tsübua koma shisabolua alir aser komaka takoksa aser tesama angur, itemji metetogo. Iba jagiang United Nations senden tashi nung iba ken o ya benoka jembir, India dang iba ama ozüng ya agientsü asoshi metetdaktsüogo. Atangji, tang tashi Indiai AFSPA agientsü memulunger saka Sharmila den asenokia dena maneni ola adokra memenui yakta iba ozüng ya asen lima nungi agientsü. Iba ozüng ya tasen masü saka 1958 küm Naga nunger reshikangshitsü aser Naga yimten nüchiso atema jembiba o samadaktsütsü asoshi latetba ozüng ka lir. Aji oda, iba ozüng ya amshia küm 58 dak tali India sepaitemi Naga nungertem tsübudakja aruaka tang tashi Naga yimten temeten indang jembiba manener aser manentsü, kechiyong alima nung nisung kati pa mesüra la temetem jembitsübaji tim dang, ibaji shingaia kecha tashi amshia nokdangtsü makok. Aji oda, Indiai memulungerji ta ser asenoki asen yimten temeten indang jembi anenra aser asen temeten amadokra, kenlirbo asenok ya India nungera masü aser Naga nungera masü ta kümdoktsü. Ashiko, asenoki asen temeten memeteti kümra, mapang ka nungbo tangari asenok dang oshibo America nunger oshi jembir, tereprangtsübo Nepali nunger mesük saka sensobo India nunger ta zülua lir, ya kechi shilu (kin) ? , kong nungi aruba ? ta asüngdangtsü. Atangji, tanga Assam ajanga ora Kolkata nungi yamaji asüngdang tenzüker. Iba jagi asenok asoshi tebilemdangtsü aser teinyaktsü wadang tulu ka sayur. Koba lima nung kechi kin südir süaka, tekolok aser shisatsü shitak ali tashibo senso kati pei lipok aser temeten indang jembi manener. Ibaji kin ka senmang lir. David chubai Tsüngrem dang, ” Ni Yirusalem amadokra, kü teka tachiji ashirepdakjang,” ta azüngashia sarasademba olaji senso kati pei temeten aser pei tetsü taso lima meimba ola lir. Iba amaji Naga nungertemi Tsüngrem dang Naga lima aser nübortem ya pi bendanger ozüng tamajung kübok malitsüsa taochi aser tashi meshia maneni sarasadema inyaktsüla. Atangji, alima tila aser nütsüng ishika aser rongsen bushiteta mamshitetba kin asünungji temeten liaka India kübok malitsüsa nüjisobo mangutsüa akok saka Naga lima nung Indai sepaitem tsübua melira aser Naga lima nung Naga nunger mulungba nung temzüng ozüng lateta yimsüsüa otetra, tanü alima aso tasenba nung yimten nüchisoji aji asütsü. Atangji, tanga iba amaji sadoksadoka alitsüsa India temzüng küboksa süaka Article 371 (A) nung Naga nunger nem temeten aika agüja lir saka timtemji asenoki asenoksasa item ozüngtemji mapa küma mamshitetter. Article 371 (A) ali tashijibo India küboksa süaka Nagaland tatar senden nung melatet tashibo India tatar hoho nung latetba temzüng ozüngi Naga nunger alentsü makok. Ajisüaka, alendaktsür ! Ibaji India tai masü asenok tai asütsü. AFSPA ya-a India tatar hoho nung latetaka, Nagaland nung amshitsü mesüra mamshitsübaji Nagaland Legislative Assembly mulung. Tripura nungbo Tripura state government-i par state nungi AFSPA agienogo. Kechiba Nagaland state government-ibo magientetter ? Agientsüla !