Agartala-Akhaura rail project tembanga inyaktsü anogo atsülanger

Agartala, Tsüklai/February 6 (Agencies): Tripura aser Bangladesh na sendakteptsü asoshi yanglua aliba Agartala-Akhaura rail project tembanga inyaktsüba anogo maneni atsülangogo.
West Tripura district magistrate Sandeep Mahatme-i ashiba agi, iba project ya 2021 küm September ita tembangtsü. Taoba mapang iba project ya 2021 küm March ita 31 nü tashi nungbo tembangtsü ta sangdonger liasü.
Tripura District magistrates aser Bangladesh deputy commissioners tem Bodhbarnü iba dak sendakba nung Agartala kübok state guest house nung senden ka mena liasü.
Senden tembangba sülen Mahatme, shiba lenisüba kübok India nungi ketdangsertem iba senden nung dena liasü, pai Agartala-Akhaura rail project indang sensak asemba metetdaktsü. Senden nung project ya 2021 küm September ita tashi nung tembanga inyaktsü lemtetogo.
Paisa, district administration-i iba project asoshi ali mekazüka aoba inyakyim indang metetdaktsü, aser ashiba agi, Tripura aser Bangladesh na prongla nung iba inyakyim tembanga inyakatokogo.
Mahatme-isa, Tripura aser Bangladesh nati border haats talila asem amenoktsü asoshi telemtetba agiogo.
Linük ana prongla nungi ketdangsertemi Sepahijala kübok Jagatrampur, Khowai nung Paharmura aser West Tripura district kübok Bamutia semdangtsü, kong border haats amenoktsü asoshi sentong lir, ta pai ashi.
Temsemtem semdangba sülen ketdangsertemi linük anaprongla nung Ministries of Industries nem osang agütsütsü.
Senden nung ano arrtsü nung atsü, nisung shibelenba, temesepba mozü shibelenba, osettsüt belentepba aser border haat talila amenoktsü asoshi onüktem benoka sensaksemogo.
India nunger ketdangsertem Dr Sandeep Mahatme leneba nung iba senden nung aden aser Comilla district deputy commissioner Md. Abul Fazal Mir-i anir Bangladesh nunger ketdangsertem senden nung aden.
Khowai aser Sepahijala district magistrate, West, Khowai aser Sepahijala district nungi police tekolaktem aser tanga ketdangsertema iba senden nung aden. Kasaji Bangladesh nungia Moulvibazar, Comilla, Habiganj aser Brahmanbaria dictrict deputy commissioners aser police tekolaktem aser ketdangsertem dena liasü. Maneni BSF aser BGB ketdangsertema iba senden nung denogo.