Agartala nung ango dak miim mozü keter angu: Minister

Agartala, February 28 (Agencies): Shishilembadak tesem balala nungi ango bendena reprangba nung, nisung temang nung timtem agütsüba miim aser shisaa aotsü makokba, ‘formalin’ mozü ngutet, ta Tripura state assembly nung metetdaktsü.
“February 8 nungi 25 tashi nung ketdangsertemi tesem balala nungi tetendangba agitsü asoshi ango 40 bendena Regional Food Testing Laboratory nung tendang, aser ango 11 dak ‘formalin’ liasü,” ta Tripura Health Minister, Badal Chowdhury-i state assembly nung metetdaktsü.
“Tripura nung anguba aser Bangladesh nungi bener aruba ango nung ‘formalin’ aliba mita reprangtsü asoshi sorkari sentong balala amshidar,” ta Minister-i metetdaktsü.
“Fish Safety Officer aser district ketdangser dang tesem balala nungi ango bendena miim mozü ali mali tendangtsü asoshi mapa nungloktsü. Memerükba angotem shishilembadak ayoktsü asoshi sorkari memelatsü,” ta paisa ashi.
Chiyongtsü nung mozü meyokteba amshiba reprangtsü asoshi sub-division shia nung Food Safety Officer kaka shima ayutsü asoshi sorkari maparen tenzükogo.
“Food Safety Security Act & Rule 2011 nung aliba ama aibelenertem dang sen lakh 1 nungi 10 tashi senchi achitsü, mesüra tepuokdak ayutsü mesüra temerenshi anaprong agütsütsü, aser item ken o ya Session Judge temi reprangtsü,” ta Chowdhury-i metetdaktsü.