Agartala nung chi auso ka sen 1 yong sensakertem nem agütsür

Agartala, Aami/June 24 (Agencies): Social activist Biplab Kar-i tanga shishilembartem teyari nung Tripura yimtiba Agartala nung wara pokteter aliba mapang teyari agütsütsü atema asalendong tajung adongteter inyakdar.

Parnoki Agartala nung sensakertem nem sen ka yong chi auso ka ayoker. Iba sentong tajung apiteta inyakba ajanga lokti nung sensakertem nem teyari tulu agüja arudar, shirnok wara poktetba aser state mokdanga ayuba ajanga tamajungtiba kongshir lir.

Social activist Biplab Kar shiba Tripura e-rickshaw Sramik Samiti tir lir pai, wara poktetba mapang nungi sensaksertem nem teyari agütsütsü asoshi kechisa takoktsü ali aji ajak inyaka arudar, ta ashi.

Anogoshia sen ka yong nisung 200 shi mesüa arudar. “Chiyongtsü agütsüba dak alia onoki ration kits, masks aser sanitizers tem lemtsüba amala jenjang balala agia arudar. Onoki Bodhbarnü nungi tenzüka chiyongtsü agüja arudar aser maneni inyakyonga aotsü merangtsü” ta Kar-i ashi.

Kar-isa, chi aser songolemba aon hopta nung anogo pongu nü agütsütsü aser anogo ka entsü mesera anogo agütsütsü aser anogo ka shi agütsütsü, ta ashi.