Agartala nung nisung 10-i tetsür ka dak tashiyim benshi

Agartala, Rongjui/September 26 (Agencies): Mongolbar aonung nisung 10-i tetsür ka den shi nung tshiyim agi medemba sülen tetsürla ya mozükidangi anirogo.
Tetsürla yagi, la dak Agartala kübok Usha Bazar tesem nung tashiyim benshi ta police nem metetdaktsü.
Tetsürlai ashiba agi, la Mongolbar nikongtsütsü GBP Hospital nungi Battala tesemi meyipa aotsü atema lai autorickshaw driver ka aja, shiba lai kanga junga metea lir.
Mapang tatsüka lir autorickshaw driver yagi la mozükidang nungi anizüka anir ao. Lentom nung auto driver yagi tangar ana ani aser iba sülen driver yagi tanga tesem kati anir ao.
Tensa majungba asateta tetsürla yagi teyari asoshi ayimten tenzük saka la den mena aliba nisung ana yagi la sot.
Tetsürla yagisa ashiba agi, la Usha Bazar-i anir ao kong ano nisung tenet aru aser parnok ajaki ka khen ka khen ta la den tashiyim agi shi nung medem tenzük.
Laisa ashiba agi, parnoki la tepsettsü jembitep saka lai la taküm asoshi mepeshia liasü.
Iba sülen la kasa auto nung bener oa Circuit House tesem anasa toktsü. Tetsürla yagi par kinungertem den tongtepratepba sülen la kinungbo la tani aru aser Tripura Medical College & Hospital-i anir ao. La tang mozüki nung temang anepaludar.
Tetsürla kinungboi ashiba agi, iba ken o benoktsü atema parnok police station asem tashi ao saka iba ken o agizüktsü asoshi police station ka danga renema maliasü. Tatem nung parnoki West Agartala Women Police Station nung ken o ka benok.
Iba dak sendakba nung Bodhbarn nikongtsütsü police temi aija alir ana puogo. Aija alir ana ya Pradeep aser manu ta jangjaogo. Police temi ashiba agi, parnoki tanungba nisungtem bushidar.
Iba osang prokshia aoba sülen yimden yimsüsürtem aser lokti tentet balala nungi lenirtem mozüki-i oa tetsürla semdangogo.
Tetsürla den ajurutepba sülen CPI(M) lenir Panchali Bhattacharjee-i osang bener dang ashiba agi, Agartala nung taoba mapang iba amala tatalokba ataloka mali. Lai aibelena alirtem tangsa tang aputsü khangogo.
Congress lenir Subal Bhowmik-ia mozüki semdangogo. Bhowmik-i osangbener dang ashiba agi, “onoki angazükba agi BJP MLA kati tetsürlar kinunger nungi FIR magizüktsü asoshi police nongshia liasü aser ibayongji police temi ken o agizüktsü memulungi liasü.”
Human rights activist Purushottom Roy Barman aser par telokia mozüki nung tetsürla semdangogo aser iba tatalokba aitsüogo. Pai tetsürla nem angati agi legal teyari agütsütsü nangzükogo.