AGHSS ‘School Fest’ nung Dabit-i shilem agitsü

Dimapur, Mongputeni/October 04, 2019 (TYO): Assembly of God Higher Secondary School tentetsang asür, Rev. Dr T N Lotha asoba anogo bilemtetta, school-i Kaliedoscope 2019 ayongzüktsütsü ternemba lir. Iba School Fest sentong ya 2017 küm tenzüka November 14 aser 15 nü agia arudar.
November 14 nü iba fest Fest tenzüka mezüng Children’s Day aser Fun Fair sentong agitsü aser November 15 nü Jam Session (Concert) ayongzüktsü.
Iba sentong nung shilem agir artiste ji international/national artiste, local artiste aser AGHSS kaketshirtem nungi asütsü.
Tesüiba küm ana tejakdang iba Fest sentong nung artiste talisa Alobo Naga, Tali Angh, Zuchobeni Tungoe, Saurabhi Debbarma (Indian Idol), Rokovituo, Seyivenuo aser Joyphen nungeri shilem agia liasü.
AGHSS nung kaketshirtem asür, Rev. Dr T N Lotha mangdang den jangyumedema odaktsütsü aser iba denji külemi parnok sempet sayudaktsüba den ajungshitsü nükjidong nung iba sentong ayongzüktsür.
Iba Fest sentong ya kaketshirtem atema sentong ka dang masü Dimapur telungtet nung tanga school nungi kaketshirtem aser temulungertem atema kanga dang yongyaba sentong ka kümogo, ta oasng ajanga metetdaktsü.
KALIEDOSCOPE 2019
KALIEDOSCOPE 2019 sentong ya nüngtugu company Musik-A events-i achaayangtsü. Taküm küm iba sentong ya tuluba aser tajung asütsü, ta asadangtetogo. Iba sentong nung South Korea nungi International Kpop artiste Dabit-i tongti shilem agitsü ternemba lir.
Dabit, shiba tenüng David Kim asütsü, pai kentener aser kenzülur ka akümtsü asoshi Seoul, Korea-i mao tsüngda Ohio, USA nung pa soa intet. Dabit indang sayaba ken ajunga ya pai mejema produce süa liasü.