Aghunaqa GBs Union-i sub-division osang jangjashitsür

Dimapur, November 27 (TYO): Niuland sub-division kübok Assam den arrtsüa aliba Disturb Area Belt (DAB) nung Aghunaqa tesem dena lir aser iba tesem indang osang Aghunaqa GBs Union-i jangjashitsüogo.
Assam electronic media-i osang tejangja memetet sür iba tesem indang osang tai prokshir, ta parnoki ashi.
Hombarnü Aghunaqa GBs Union president, Mughavi Awomi-i osangbener dang ashiba agi, “November 22 nü Aghunaqa GBs trophy atema mapa inyaka lia Assam Border magistrate-i Aghunaqa semdang aser iba sülen pai Assam sorkar dang sub divisional office headquarter ka lapoktsü lir ta osang sangoktsü.”
Iba osangji Assam nung electronic media-i aibelena belenshi aser ibaji ajanga arrtsülen tensa mejungi akümtsüsa mapang ka bentsür aruogo, ta paisa ashi.
November 22 nü Rengmapani nung senden ka amentsü jatep aser idangji state anaprong nungi DIG Border, SP Border aser district magistrate tem aden. Senden nung iba onük benoka olemtep aser ajaki angatettepa tembang, ta Mughavi-isa shisem.
November 25 nü Assam Agriculture, MLA aser MP temi osang metetpelatsü atema yimtsüng semdang aser idangji parnok dang osang tejangja metetdaktsüogo.
Arrtsülen tensa mejungi akümtsüsa liaka Nagaland sorkaribo iba onük atema ola madoker. Anungji Aghunaqa GBs Union-i state sorkar dang mapang meindoki iba onük atema mapa inyaktsü mepishir, ta Mughavi-isa ashi.