Agiyonga kecha masü asü ?

Nagaland nungbo government meyong oset aser senotsü ya kibur maliba rongsen amai lir, anungji tagitetertemi shima-shima agir. Iba jagi government meyong sen kwi arudir, kecha mapa meinyak tama raktepa agir. Magir takoksa ! Mapa meinyak aser tagütsütsü purtem nem magütsü, tiyazü mapa aser tiyazü nisung tenüng nung tashikartemi agizüka agir. Iba jagi nübortembo ali nung lishi aser auyi nungi mepila alir. Tanü Nagaland nung alirtem gari lenmang nung senzüba ya aktem den medemdang dang, aktemang parnok kidang temerükba aser tajungba alir ta bilemer. Joko, ajaki meteta aser ngua agir asünungji government meyong sen agibajibo joko auyar masü amai kümogo. Iba jagi mozü kidang teshinem menemer aser school kidang tzünglu asener. Iba jagi tantsür tamburtem aser tetsür tanurtem teyari angutsüba mangur. Asenok asoshibo tamamangtsüka, saka Nagaland Home department kübok Nagaland police nunga constable nung aiba tzümar ka nem Nagaland police ajunga anishidaktsüba tajung-tazü mapa ka, asenoki masü saka pi oagi tzümalen Income Tax purtemi puteta lir. Iba tsümarsangji melira Nagaland police (Home) department-bo tazüngla akümtsü amai jembir. Ashiko, iba tzümarsang jagi Nagaland police nung Naga nunger chanu aitsü melen par nisungang aika shimoka alitsüa akok. Ajisüaka, Naga nunger lanur aser kaketshirtemi mejashir, kechiyong tzümarsangji tezü atsüdaktsü nungbo Nagaland makatsü aser police department-a samatsü, anungji Income Tax purtemi bushisüngdangaka Naga nunger lanur aser kaketshirtembo kok-a masütsüla. Iba amaji Nagaland government nung department shia nung tzümar kaka anana kibur amai kümdaktsür lir. Parnok jagi asenok mesür aser asenok lenirtem kodang Delhi leni odir, parnoki Kolkata aser Delhi nung chuba aser chubatsür amai kanga junga anepalur. Iba taaji parnoki Nagaland government meyong senotsü aruba nungi tesadang kabo agiadoker aser iba tesadang nung jagi akümtsübua aliba asenok lenirtem nem terara lema agütsür. Iba jagi parnok tepelashi ! Nagaland nungbo asenok tulur aser tilar ajungai mapa ajak peii inyaktet ama jembitsü saka Nagaland gate adenerbo asen meyong shilem tuluba ka agütsür tsümartem jajadaktsür. Aji oda, Nagaland government meyong rongsen agi tsümar takar akümer aser Naga nunger ishika pei tsüda lemzük ama lemzüka yur election-i air. Naga nunger asoshi aji jangratemtsüka ta bilemer. Aji oda, angati anguba rongsen asünungji, kecha tapayu mali, iba sen jagi vote alia election nung tokteper aser tesüsa tadoker o madoker na prongla meshimetsür kümer tsümartem to bushir saka tsümartem toagi anasaia marur. Aji oda, temeimtsüka Nagaland nung alir nübortemi Nagaland government nem Delhi-i agütsüba sen yabo parnok meyong masü saka tulur aser takartem shirnoki mapa meinyak agizüka agitetter parnok meyonga ta bilemer. Iba jagi tagizüker temoatsüba ta bilemer yutsür. Iba jagi Nagaland government mapa nung shiba kechi atema koma shimar memetet meyirijang aika shima lir. Iba jagi Naga nunger jala jabasotem zünger kidang moktepa kazür aser mazüngertema pei yari inyaka taküm akümketa alitsü melen pei taküm agi pei nümamedangtettsüsa nemzünembonga  senzür. Atangji, Nagaland government nung ochimashi mapa yabo mebushidangyongi ateta angur, kechiyong tulu tila na menja aponger atsükshishir. Ajisüaka, tebushir mali aser tasüngdanger mali. Iba jagi CBI nem danga bushidaktsü nung koda ta taoba hopta nung ken bilemdangogo. Ajisüaka, ashi ama, state government temelaba melii CBI marutettsü. Ajisüaka, Nagaland asoshi teimla ka lir, ibaji CBI dangbo nübortem ola tuluba aser tesashiba asütsü. Aji oda, Nagaland nung ochimashi mapatem Income tax purtemi mesüra ACAUT telok amai mesüra RTI ajanga kija aser lokti balalai agiteta sayudang, nübortemi, lanurtemi aser kaketshirtemi ola adoktsüla aser tatem tashi bushitsüla. Naga nunger lanurtem yamaibo mepezütsüla! Asenok saktsüla aser ola adoktsüla ! Nagaland nung ochimashi anema nokdaktsü asoshia ano tsümar kar nüngdak asü ?