AGM-i Tir Kovind dang Akhil chioktsü mepir

Guwahati, February 26 (Agencies): Assam nung Akhil Gogoi chiokdaktsütsü atema Asom Songrami Mancha (ASM)-i Tir Ramnath Kovind dangi temepishiba shidi ka zülutsü.
Onoki online ajanga Tir dang shidi zülutsü. CAA anema lungkak aitba atema Akhil Gogoi aser tangartem pua lir aser parnok chiokang ta mepishitsü, ta ASM president Diganta Konwar aser working president Adip Kumar Phukan nati ashi.
KMSS tanishir Akhil Gogoi ya yaküm December 27 nungi Guwahati Central Jail nung puoka lir.
ASM-isa nübortem dang politics aser tangatetba balala süaka CAA anema longjemer noktaktsü atema ayongzükogo.
“Assam nung alirtemi tepuokdak alirtem dak ozüng tesashi UAPA kübok temerenshi agütsütsü ta tsübua bilemer. Assam meimertem tashiyim agi azüokba aser merenshiba ajanga tarutsü nung lokti-yimten nung timtem ajurutsü” ta ASM-isa metetdaktsü.
“Onoki United Nations indang department asem nung CAA anema petition tem benokogo aser Assam nung lisopurtem kümzüka ayutsü indang shiogo. Iba ajanga alimai Assam atema CAA majung ta asüba angatetogo” ta parnokisa ashi.
Parnokisa CAA ya United Nations aser Universal Declaration on Human Rights tangatetba anema lir ta asüba kulitem agütsüogo.