Agnes Kharshiing temang kanga mejungi lir

Shillong, Yimpoksüi (November) 12 (Agencies): Taoba Brihostibarnü Meghalaya nung social activist Agnes Kharshiing dak teka sangshiba sülen la tanü tashi life support system nung anepaludar.
Ajisüaka, Agnes den yaritepla Amita Sangma bo temang tajungba kümogo, ta North East Indira Gandhi Regional Institute of Health and Medical Sciences (NEIGRIHMS) nung ketdangsertemi ashi.
“Agnes tang tashi ventilator nung yua lir aser temang kanga majung lir. Sangma bo akhi ama yimdangi aruogo aser o jembiteter” ta NEIGRIHMS otongdar KK Pandita-i ashi.
Chief minister, Conrad K. Sangma tang Europe linüktem semdangi oa lir aser pai phone ajanga osang metetpelaogo aser mapang shia tongteprateper. Paisa sorkari akokba tashi teyari agütsütsü shiogo, ta Agnes tedi John F Kharshiing-i ashi.
Union Health and Family Welfare Minister, JP Nadda indang office-i NEIGRIHMS ketdangsertem den osang agiteper aser Agnes o lar medemer Amita Sangma na yaritsü atema shiogo ta osang ka ajanga ashi.
Agnes ya Civil Society Women’s Organisation nung tir lir aser lai sensakertem aser ajemrepa aliba nübortem temeten atema mapa inyaker.
November 8 nü Tuber Sohshrieh tesem nung nisung 30-40 kati Agnes aser Amita Sangma na dak teka sangshi.
Geneva nung amenoka aliba Asian Forum for Human Rights and Development (FORUM-ASIA)-ia iba tatalokba khukhua aitsüogo aser bushisüngdang asütsü atema takhangba agütsü.
Swaraj India Party (SIP)-ia iba tatalokba atema aser ano nakmati shibelenertem aser police tsüngda tesentaktep bushisüngdangtsü atema takhangba agütsüogo.