AGOK-i Atu Zumvu nem tenüngsang agutsü

Dimapur, April 12 (TYO): Angami Gazetted Officers Krotho (AGOK) tenüng nung Tir, Dr. Kedozeto Punyü aser General Secretary, Megolhu Dolie nati tang Kohima SDPO teinyakdak, Atu Zumvu, NPS-i April 6 nü New Delhi nung Tir, Pranab Mukherjee ket nungi Shaurya Chakra award agizükba atema tenüngsang agutsür, ta sangdong ka ajanga metetdaktsü.
Atu Zumvu ya tensa tajung-majung ajak nung teinyaktsü shitak inyaker ketdangser ka lir aser ibaji ajanga pai konang nüngsang angu, ta shia Krotho-i, pai tasütait tatishishitsü tajung sayuba aser pa wadang shitak inyakba atema pa nem tenüngsang agutsür, ta ashi.
Krotho-isa pai taoba mapangtem nunga US special agent medal (2013), India Cyber Cop award (2011), Governor’s Gold Medal (2009) aser Governor’s Commendation Certificate (2005) award tem anguba atema tenüngsang agutsü.
Pai maneni kasa tanela agi inyaktsü aser tashi tasen ngua inyakba ajanga Krotho aser state nem maneni konang nüngsang bener arutsütsü teimla nung sarasademtsür, ta Krotho-isa metetdaktsü.
State nung ketdangsertem aser tongtibang nisungtem den külemi National jenjang nungia pa mapa tajung reprangteta pa nem tetushi agutsütsü atema pa tenüng benokba asoshi ajak dang pelaba metetdaktsür, ta AGOK-isa metetdaktsü.