AGP-i HM dang Assam tzümetsüng lendong linük ajunga tebilemtsü ta sangdongtsü mepishi

Guwahati, August 30 (Agencies): Asom Gana Parishad(AGP) ya Assam nung Bharatiya Janata Party (BJP) party den sendakteba lir aser parnoki Bodhbarnü Union Home Minister Rajnath Singh dang Assam nung tzümetsüng lendong ya tali tajungba nung anepalutsü atema national calamity ta sangdongtsü atema mepishiogo.
Home Minister dang shidi ka nung AGP puri ashiba agi, state nung tzümetsüng ajanga nüburtem nem takoksa aika bener arutsüogo.
“Tawa tzümetsüng ajanga state nung district 30 dak kongshiogo aser iba ajanga nisung aika talidak ki makai kümogo. Tsünüsenpongtsü ali hectar lakh 3,828 nung tsünüa aliba raksatsüogo. Onoki Assam nung tzümetsüng lendong ya linük tebilemtsü ka ta sangdongtsü atema akhanger,” ta shidi nung zülua lir.
Iba shidi nung maneni parnoki Home Minister dang state nung security tsütsü tebilemtsütem aser Assam accord mapa küma inyaka aotsüba atema shisema zülua lir.
Maneni iba shidi nung AGP puri ministry dang Assam nung bendanger arua alibatem tekaratiba nung bushiteta pei limai meyipa yoktsü asoshi mepishi.
“Onok nenok dang Assam nung kuli kaket tejangja makai arua alir bendangertem tekaratiba nung bushiteta pei limai meyipa yoktsü atema jenjang tapet agitsü asoshi mepishir. Maneni onoki nenok dang bendanger sorkar den parnok lisopurtem meyipa agizüktsü atema jenjang tapet tekaratiba nung agitsü asoshi mepishir,” ta kasa shidi nung shia lir.