AGP lenirtemi lokti senden ka ayongzüka aka

Guwhati, December 22 (Agencies): BJP den longjemer aliba telok Asom Gana Parishad (AGP) pur-i Brehostibarnü Citizenship (Amendment) Bill dak sendakba nung ken o, tebilemtsütem aser iba ken o dak sendakba nung parnok tamendak dak indang sensaksemtsü asoshi lokti tentet balala nungi züngsemtem den ajurutepa liasü.
Centre nung BJP-i aniba sorkari Pakistan, Afghanistan aser Bangladesh nungi linük nung arua alirtem nem lisopur jenjang agütsütsü asoshi Citizenship (Amendment) Bill ka benoka lir. Centre-i iba bill benokba ya Assam Accord den khenyongi meputep, kechiyong iba accord ajanga state nung bendanglen nungi ozüng alema kuli kaket tejangja makai arua alirtem ajak pei linüki meyipa yoktsüba atema tetuyuba agüja lir. AGP lenirtemi iba senden nung ashiba agi, parnoki iba ken o ya angateta lir parnoka nüburtem den dena lir.
“Citizenship bill dak sendakba nung onok masetshi ajang ajanga nokdaka lir. Onok rongnungi kari Ato Kilonser aser tanga tongtibang nisungtem den ajuruteptsü aser Assam nungeri iba bill ya magizüker ta asüba osang metetdaktsütsü,” ta AGP tir Atul Bora-i ashi.
Lokti tentet balala nungi lenirtem shirnok iba senden nung shilem agia liasü, parnoki ashiba agi, AGP ama regional party tashi tait kari dang state kümzüka yutettsü. “Asenoki tang ajangshia aruba ya tamangba yimsü dak sendakba nung communalism ainba ka lir, aser iba ya tarutsü asoshi temaitsü tamajung ka lir. Iba amala tensa ka nung AGP amala tashi tait lokti ka state tenüng nung nokdaktsü asoshi nüngdaker,” ta Char Chapori Sahitya Parishad, tir Hafiz Ahmed-i ashi.