Agra nung Nagaland nungi tetsür ka den tanurtem kümzük

Agra, May 14 (Agencies): Dimapur nungi tanur tetsü kati lar tanur ana anir Agra nung mapa inyaktsü atema aru saka la mapa manguba den sen maliba ajanga kilentzü nung ayimba tzü ajemtsüsa tia ajuru.
Tetsürla tenüngji Rita lir aser la kinungbo tenu den külemi anogo pungu tejakdang Agra nung mapa inyaktsü atema tonga aru.
Honibar nikongdang Shah Market nung la aser lar tanur ana (küm 3 Nandani aser küm 1 ser tesadang Arun) nungertem kilentzü nung ayimba tzü jema lia, dokan kibur kati ngua, pai parnok nem tzü tajemtsü pongdang ka agütsü.
La ket nung senjang ka danga maliasü aser tesüiba anogo pungu tashi mapa inyaktsü mongui timtema aru. Shah Market nung alirtemi tetsürlai jembiba oshi mangatetba agi human rights activist Naresh Parashar nem osang sangoktsü aser pai tetsürla den osang metetpelaba sülen Nagaland police den tongtepratepa teyari meshi.
“Tesüiba anogo pezü tashi, tetsürla jagi jana endokdak shidenba chiyungtsü aser kilentzü yimdokba tzü tanur nem agüja aru. Lai local police den tongteprateptsü merang saka la meindok” ta Naresh-i osangbener dang ashi.
Tetsürla den ajurutepba sülen Naresh-i emergency women helpline ‘Asha Jyoti Kendra Lucknow’ den tongtepratep aser parnoki counselor ka yoka tetsürla den osang agitep.
“Rita den osang metetpela asüdang, ita tenet tejakdang la kinungbo Mukesh shiranga asü aser pa mang rongdoktsü atema lai sen aputsür ka ket nungi sen 2000 apu. Sen melena lar jabaso tambusang, arishi küm 7 tain Sonu sen aputsüsang ket nung agüja liasü. Lai sentsüh odoktsü sen peria mongutetba agi, la kinungbo tenu Pappu den Agra nung mapa bushitsü atema ao saka yimti atongba sülen Pappu-i la toktsür jena ao” ta Naresh-isa metetdaktsü.
Nagaland nung Rita ji süngolu ka nung aayanger ka liasü aser lai anogo nung sen 40 aazüka liasü.
Naresh-i Nagaland nung police ketdangsertem den tongtepratep aser Rita indang osang metetdaktsü. Idangji police-i tetsürlaji Dimapur nung alir ta osang jangjashitsü.
“Onoki activist den osang agitepdar aser pai ashiba agi, tetsürla den tanur ana Brahmaputra Mail nung arudar aser parnok Dibrugarh nung anenzüktsü. Onoki parnok Dimapur-i anir arutsü atem GRP den mapa inyakdar” ta assistant commissioner of police Dimapur Akum Lam-i osangbener dang ashi.
Rita’er jabasoji sen aputsür ket nungi kümzük asü masü ta osangbenertemi asüngdangdang, “Tetsürla Dimapur tonga aruba sülen lar jabaso aliba tesem indang osang tejangja metetba sülen onoki pa kümzüktsü” ta ACP-isa shisem.
Agra nung human rights activist Naresh-i dokan kiburtem- Saurab Jain, Rakesh Malhotra aser Vimal nunger ket nungi sen 3000 sarutet aser iba jagi Rita aser par tanurtem atema chiyungtsü, tzü, süoshi aser train ticket alitsü.
Par asem Deobar anepdang 3:00 ako nung Tundla nungi Dibrugarh-i aoba train nung tua amen. Tundla RPF aser GRP force temi parnok Dibrugarh tashi meintsü.