Agri dak sendakba luyim nung temulung agütsütsüla: Kelei

Dimapur, Aenjeti (January) 24 (TYO): Farm sector nung Agri dak sendaktepa aliba maparen balala inyakba ajanga yimdaklirtem rongsenkettsüng ainba kisüng masü saka nüburtem rongnungia talisa iba ama maparen nung metaloka alirtem ajangzüktsü, ta Secretary RD & Secretary to Chief Minister of Nagaland, Kelei Zeliang, IAS-i Sangtennü ashi.
District H.Q, New Peren nung VCU & VDB Association Conference Hall-cum-Office ki ka semzüktsüba sentong nung jembiba mapang, sector mashi ka nung renloktsü asoshi mapa mesüra yimya tasen apitetba, nükla tajung ayuba aser mapa meranga inyakba ya tongtibang shilem ka lir aser item ya yimya ka kümdaktsütsüla, ta Kelei-i ashi.
Iba sentong nung tongti tesemdanger ji Chief Minister TR Zeliang liasü, saka pa koda masüba maparen kar aliba ajanga medentet, aser pa melen Secretary-i jembiba mapang, mapang talangka tajangzük angutsüba luyim nung farmers’ cooperative society amenoka sorkar aser ICAR Research Complex Jharnapani den külemi longjemer technology aser service tasen den agro-business tenzüktsü nüngdaker, ta ashi.
Paisa nüburtem dang, tanü asüng tensa nung sorkar dak dang metaloker aliba yimya ya jungjunga melenshitsüla, ta ashi. “Asenoki sorkar dang senotsü teyari meshiba anendi, koba ajanga ochimashi lenmangi anir. Asenoki agri dak sendakba ak, angu, kiset shirurutem metsühba, horticulture dak sendakba dragon fruit, totzü yangluba süngjangtem aser king chilly amala shishilemba tenzüka aluyimertem pa poksüngba kisüng masü saka lokti yangerba nung shilem agidi,” ta Kelei-isa shisem. Tongti tesemdangerisa iba sentong nung adener dang ajak ajangzüktsüsa iba ki ya junga anepalutsü shisem.
Iba ki semzüktsüba sentong agiba sülen Secretary Kelei Zeliang-i DRDA ketdangsertem aser BDO tem ajurua Ministry of Rural Development kübok yimdaklir sensaker nem central welfare scheme agütsübatem amshiba indang osang ola agitepa liasü.
Iba sentong nung district ketdangsertem den Peren district kübok sorkari recognise süa aliba yimtsüng 89 nung putu yimsüsür aser VDB tem dena liasü.