Agri Dept-i Niuland nung süngodong lema agütsü

Niuland, Chiteni/July 22, 2022 (TYO):  Niuland Sub-Divisional Agriculture Office-i Bodhbarnü (20.07.2022) Tea development program (RKVY) kübok Niuland district nung ‘small tea growers’ atema süngodong (Tea sapling) lema agütsüba sentong ayongzük, ta sangdong ka ajanga metetdaktsü.

Deputy Commissioner Niuland, S. Sara Jamir-i ashiba agi, Nagaland nung aluyimba district rongnung takatiba akümtsü asoshi Niuland district dak tashi lir, kechiyong tsünüsembongtsü tapu balala yoktsü atema iba district nung ali aser tzü mopung kanga dang tetemsü.

Süngodong timba tema süngolu tuluba kümdaktsütsü asoshi inyaktsüla aser ibaji ajanga tangar atema mapa maongka adoktsü, ta lai süngolu ayimertem ajungshia liasü

DC-i, stakeholder balala longjemer inyakba indang metetdaktsü aser süngo tsünür nem technical ajanga nungittsü aser nüngdakba kol osettem (machinery) agütsütsü asoshi SDAO Niuland dang mepishiogo.

Tea industry nung tali jangjatettsü asoshi Niuland süngo atema patent’ ka register asütsü asoshi lai bilemba lemsatep.

Iba sentong nung süngolu ayimer/tsünür nem süngodong 50,000 lema agütsü. District nung süngolu tsünür tenüng nungi Kuhoxu village, Head GB, TokisheZhimomi-i jembia liasü.

Iba sentong nung Obed Chisho, AO menden liasü aser Niuland SDAO, L Kivika Chophi-i okila jembi. Sentong tembanga Leah AI-i tepela anküp o jembi.