Agri Expo site, Dimapur nung Pineapple Fest 2017 tenzükogo

Dimapur, August 08 (TYO): Mongolbarnü Agri Expo site, 4th mile Dimapur nung  tang mezüngbuba state level Pineapple Fest 2017, “Naga pineapple subsistence to enterprise” omen nung ajemdaker tenzükogo.

Iba benjung ya Nagaland aser Arunachal Pradesh Angh, PB Acharya-i tenzükja liasü.

Anogo ananü benjung ya Horticulture department Nagaland, Indian Council of Agricultural Research (ICAR), NEH region, Nagaland centre, Medziphema, School of Agricultural Sciences & Rural Development (SASRD), NU Medziphema aser Central Institute of Horticulture, Medziphema senteper ayongzük.

Sentong nung jembidang state Angh Acharya-i, Nagaland nung jiru temaba jenjang kati ajungkettsü atema lemsatepba tasatemji mapa küma inyak nungdang iba benjung ayongzükba ya tetezü akettsü, ta metetdaktsü.

Paisa market link bushitsü, jenjang taliba akettsü aser iba chiyungtsü wazüka ayutsü atema PPP mode nung committee ka tentettsü benokdang.

Iba sentong nung tetushi tejaoker, Minister of Horticulture, DB & GB, Kejong Chang-ia aluyimertem dang meranga inyakba ajanga state nung jiru aika züsentettsü ajungshiba den külemi aluyimertemi parnoki jiru aika züngsenteta sayaba atema tenüngsang agütsü.

ICAR Joint Director, Dr. D.J. Rajkhowa-i, northeast nung jiru dang masü saka tanga aonsotsü aser süngjanglijang aika adokdaktsütettsüsa tashi lir, ta ashi.

Tanep iba sentong nung Horticulture Joint Director, Dr. Elithung Lotha-i CIH Director, Dr. Lallan Ram-i renemba okila zünga metetdaktsü, Horticulture Secretary, Alan Gonmei, IAS-i lokti pelaa agizük aser Horticulture Director, N Amos Ao-i tepela anküp o jembia liasü.