Agri ketdangsürtemi aluyimertem yaritsü aser taila aluyimer jangjatsü tuyur

Kohima, September 2, 2022 (TYO): “Centre aser state sorkartemi agri & allied sector tajungba kümdaktsütsü atema süoki ia inyaker anungji agriculture department ketdangsürtemi aluyimertem taginübatem tongtsütsü atema bendnaga agütsüshitsü ayongzüker” ta Agriculture & Cooperation Minister, G Kaito Aye-i ashi.

Hokolbnarnü Capital Convention Centre nung Agriculture Officers’ Co-ordination senden nung jembidang Minister Aye-i aluyimertem tonga oa ajuruteptsü, sensaksemtsü, ajungmesotsü aser aluyimba nung technology tasen amshiba indang shisatsü agütsütsü atema ayongzük.

“Aluyimertem indang schemes/facilities mapang shitak nung tatongtsüpur atongtsüla aser aluyimertem indang PMKSY schemes nung taila beneficiaries jangjatsüla. Aluyimertem dang KCC loans agitsü osang sangoktsütsüla kechiyong iba ya sen tetemlok magiba loan lir. Maneni aluyimertem dang commercial crops tsünütsü ajungmesotsüla” ta paisa ashi.

Ketdangsür aikati kanga junga inyaka arudar aser tebilemtsü khuret aliba department ka nung ketdangsürtem ama maneni tejangraba nung aser bendanga agütsür inyaktsüla, ta Minister Aye-isa metetdaktsü.

“Centre mesüra State sorkar nungi aruba sen den medemdangra terenlok kangabo mali. Anungji asenoki teimba züsentettsü atema temulung agütsütsüla kechiyong terenlokji Department indang konang asütsü” ta paisa ashi.

Minister Aye-isa PM-KISAN aser Kisan Credit Card dena Centre sorkar indang scheme balala nung temulung agütsütsü atema ayongzük.

Nagaland nung aluyimba ya tongtipang kümdaktsütsü atema aluyimertem ajungmesotsüla aser department-i parnok ketdangsüa anitsüla aser yaritsüla, ta paisa ashi.

“Ketdangsürtemi aluyimer asoshi training aser seminars ayonga agitsüla aser scientific method sayutsüla. Aluyimertem takok ngudaktsütsübaji Field Officers tebilemtsü khuret asütsü saka aluyimba maparen nung tamakok angubaji Agriculture Department indang aibelen asütsü” ta Minister Aye-isa metetdaktsü.

Nagaland nung blocks 74 nungi 29 nung bank lapoka mali aser iba jagi aluyimertemi scheme balala nungi teyari agitsü asoshi khuret ajurur. Anungji scheme indang senji DDO ajanga agütsütsü atema mapa inyaktsüla, ta paisa ashi.

“Asenok longjemer aluyimertem ajungkettsü atema merangdi aser Nagaland nungi talila tsünütetdaktsüdi” ta Minister Aye-isa ketdangsürtem ayongzük.

Iba sentong nung Agriculture Production Commissioner, Y Kikheto Sema-i o jembidang “agriculture department ya agri & allied department ajak atema tetsü lir aser tanga allied departments len anitsü, anitettsü aser yaritsüla” ta ashi.

Nagaland nung nütsüng yongsük 70% tashi yimtsüngtem nung alir aser aluyimba mapa inyaker anungji Agriculture department ya kanga tongtipang lir, ta pai ashi.

“Nagaland nung ali kibur inyakyim aser aluyimba sobaliba ya alima nung university kecha nunga mesayur anungji modern agriculture systems azüngertemi Naga nunger aluyimertem meyaritettsü” ta Kikheto-isa ashi.

“Anungji asenoki Naga nunger aluyimba sobaliba ya syllabus nung enoktsüla aser iba jagi modern technology teyari angutsü” ta paisa shisem.

“Naga nungeri aluyimba inyakyim ya rongsenketzüng aser alinük asoshi majung anungji asenoki aluyimba inyakyim melenshitsü nüngdaker. Department ajak longjemer aluyimba ya shishilembabaren ka ama kümdaktsütsü aser aika tsünütettsü atema Boke-Botsa nung Naga Integrated Settled Farming tenzük” ta APC Kikheto-isa metetdaktsü.

Agri and Allied department tem longjemer aluyimertem tsüngda yaritepa inyaktsü osang sangoktsütsüla, ta paisa shisem.

Nagaland nung tetsür aluyimertemi Gross State Domestic Produce nung shilem tulu agir aser state sorkari Agri Expo site nung yipden 120 aliba women farmers’ hostel ka yangludar ta paisa metetdaktsü.

“Nagaland nung ketdangsürtemi taila PM-KISAN beneficiaries jangjatsüla. Tang tashi nung aluyimer 524 dang jangjaogo aser taila aluyimer teimtiba jangjatetba district ketdangsürtem nem sempet agütsütsü aser iba mapa meinyakertem merenshitsü” ta Kikheto-ia Minister Aye pusema metetdaktsü.

Paisa ketdangsürtem dang aluyimertemi sen tetemlok melii sen aputettsü atema Kisan Credit Card osang sangoktsütsü ayongzük.

“Nagaland nung district tasentem nung staff agi meperiba khurettem ajurua alitsü akok saka mapa tasen adoktsübaji tamakoktsü lir. Anungji ketdangsürtemi tang aliba ama dang inyaka oa atatsü mepishir aser pei lemzükba tesem nung aluyimertem yaritsüba dak alaka transfer aser postings atema merongshitsüla” ta APC Kikheto Sema-isa metetdaktsü.

Iba sentong nung Agriculture Department Additional Director, C. Peter Yanthan-i okila jembidang “tawa Agriculture Department-i yaritepba ajanga aluyimertem jenjang tajungba kümogo” ta ashi.

United Nations (UN)-i 2023 ya “International year of millets” ta sangdongogo anungji department-ia iba dak rangloker sentong atongdar ta paisa metetdaktsü.

Iba senden nung mendenji Agriculture Director M. Ben Yanthan liasü aser Agriculture Additional Director, B. N. Phom-i anküp tepela o jembi.