Agriculture Department senden nung Minister aden

Dimapur, Chiteni/July 25 (TYO): Agriculture & Cooperation Minister G. Kaito Aye-i Directorate Agriculture nung July 25 nü lepa reprangshiba senden ka amenba mapang ashiba agi, department ya state nung aliba nüburtem atema lir aser tajangzüktem Nagaland nung aliba nüburtem ajak ket atongtsüla.
Paisa, India sorkari aluyimba tsütsü kanga temulung agüja inyakdar anungji department-i sentong aser scheme balala bushiteta takok ngua inyaktsüla, ta ashi.
Kaito-i, iba maongka ya shinga ket nungi magintsü ta ashiba den pai districts aser sub divisions ajak semdanga yimtsüngtem nung sensaksema parnok tebilemtsütem angadangtsü aser districts o sub divisions tem dang parnok maparen aser parnoki ajangtetba tem sayutsü asoshi mepeshitsü, ta ashi. Tetsürtemi shilem agiba paitoktsü makok anungji SHGs tem ajungkettsüla aser temaba jenjang tongtettsü ajungshitsüla, ta pai ashi.
O jembiba mapang pai, department kübok inyakertem azüokshitsüla ta ashi ajiasünungdang iba inyakyim nung department tsüngda tesendaktep nung meinprong kecha malitsü. Facility tem ajak sorkari agütsür asünung nisungshiai pei nem nongloktsüba mapang aser khuret angatettsüla aser tanaben bendanga agütsüshir inyaktsüla. Pai ketdangser aser field staffs tem dang aluyimertem den tesendaktep yanglutsü aser parnok timtem jangjaa takaratiba nung bentettsütsü merangtsüla, ta ashi.
Department nükjidong ya papers aser presentation nung dang masü saka asangsang nung atalokdaktsütsü nükjidong ayutsüla ta shia department dang maparen tekaratiba nung inyakyonga aotsü paisa ajungshi, kechiyong scheme aser project tem aika mapang tatakzük ka nung dang inyaktsü lir.
Maparen balala takok ngua inyakba osang tejangjatem Annual Administrative Report ajanga sayutsüla ta ashiba den department dang ochishia inyaktsü minister-i ashi. Paisa, line department ajak ajungkettsü aser tesendaktep tajung ka yanglutsü atema Agri aser allied department arok senden ka yakta amentsü ta ashi.
APC & Principal Secretary, Agriculture, N. Hushili Sema, IAS-i o jembiba mapang, aluyimertem ka ita ora nüburtem ka ita aotsü ta ashi. Lai officer tem dang kati ka den sendaktepa aser bendanga agüja inyaktsü ajungshi. Department tajungba nung inyaksangshia aotsü atema tesendaktep tajung alitsüla ta shia lia department mapang ajak ochishia inyaktsü aser tajangzük tajungba ngutettsü atema nükjidong yur alibatem mapang shidak nung inyaktsü mepeshi.
Maneni lai, department-i shilem tajung agia lanurtem temulung melenshidakja Agri sector aser iba den ano tanga mapa nung ajemoka inyaktsü ajungmesotsü ayongzük.
Hushili-isa, department dang tetsür aser tebur ajak ajungmesoa pei sasa pei poksüng aazüktsü asoshi atsü apong mebendangi ajaki amshitetba hadirtem timba agütsütsü ajungshi.
Senden nung Additional Director, Agriculture, C. Peter Yanthan-i, department-i ajangtetba aser inyakyim power point presentation ka ajanga agütsü. Pai, aluyimba ya state rongsenketsüng tamendakdak lir ta ashi. State nung nütsüng yongsük shilem 80 yimdak yimtsüngtem nung alir aser parnok aluyimba dak metaloker alir, ta ashi.
Maneni Peter-isa, department-i Jhum farming, crop zone inyakyim nung Organic farming nunger amala ajungkettsü asoshi sentong yanglua aliba tem metetdaktsü aser iba sülen pai centrally sponsored schemes (CSS) tem indang metetdakja liasü, ta ketdangser sangdong ajanga metetdaktsü.