Agriculture Dept additional director den tepila sentong agiogo

Dimapur, Aenjeti/January 6 (TYO): Agriculture Kohima Department-i January 6 nü additional director S. Kivikhu Achumi den tepila sentong ka Directorate of agriculture, Kohima conference hall nung ayongzüka agiogo.

Staff tem tenüng nung o jembiba mapang Agriculture Kohima, Additional Director C. Peter Yanthan-i, department bendanga agüja tenzükba aser pa mapa tajung asoshi Kivikhu dang kanga pelaba lemsatep.

Pa nem tenüngsang agütsüba mapang anema lia mapa nungi anentsüsa maongka anguba ya takok tulu ka ta Yanthan-i ashi. Peter Yanthan-isa, Retired Additional Director indang service Profile lemsatepa liasü.

Additional director S. Kivikhu Achumi-i tepila o jembiba mapang department nung ketdangsürtem aser staff tem ajak dang pa mapa inyakba tepeyong nongita yariba atema kanga pelaba lemsatep. Paisa, agriculture department ya kanga dang tongtibang department ka aser iba ajanga nüburtem ajak tem dang meranga inyaka department nema dangdaktsütsü ajungshi.

Tepila sentong nung department nungi ketdangsür balalai Kivikhu-i inyakteta toktsüba mapang tajungtem indang lemsatep aser mapa takok nung tembangtetba atema pa nem tenüngsang agüja liasü.

Iba sentong ya Director of Agriculture M. Ben Yanthan lenisüba nung agi. Sentong nung Agriculture Department ketdangsürtem aser staff temi shilem agia liasü.