Agriculture minister Atul Bora-i AAU semdang

Jorhat, June 18 (Agencies) : Tang mezüngsüa Assam Agricultural University (AAU) semdangsang Agriculture minister Atul Bora-i, par department-i state nung tsünüsempongtsü peria adokdaktsütsü, ta Hokolbarnü metetdaktsü.
AAU vice-chancellor (VC) Kamal Malla Bujarbaruah-i, state sorkari dang teyari peria agütsütettsü numgbo par university-i küm asem tsüngda nung state atema süngjang aser tsünüsempongtsü peria adokdaktsütettsü, ta ashi.
Pai, “Agriculture, soil conservation, irrigation aser PWD department tem nung sorkari temulung agütsü nungbo state nung agriculture pasasa junga akümtsü,” ta ashi.
“Ajak liaka sorkari agriculture cabinet ka tentettsüla aser aluyimer terenlok atema inyakyim kar tenzüktsü nüngdaker,” ta pai shisem.
VC, Kamal-i mepishiba langzüa, Bora-i, ” Ni AAU taginübatem agizüker aser item nükjidongtem tongtsütsü merangtsü,” ta ashi.
Bora-i department meyong plant pathology ki ka semzüktsü aser teburtem alitsü atema hostel ka yanglutsü atema AAU kima long ka azünga yutsüogo.