AgustaWestland ken o nung CBI-i SP Tyagi den nisung ana puogo

New Delhi, December 09 (Agencies) : Hokolbarnü Central Bureau of Investigation (CBI)-i AgustaWestland ken o nung taoba mapang Air Force tongti, SP Tyagi den tangar nisung ana puogo.
Tyagi dak alia tangar nisung anaji Delhi nung amenoka aliba lawyer, Gautam Khaitan aser Sanjeev Tyagi (Julie Tyagi) nata CBI-i apu.
Ochimashi mapa mesüra ozüng alema inyakba nung tai tonglokja parnok ajak apu, ta CBI-i ashi.
AgustaWestland-i sen crore 3,600 indang helicopter contract agitettsü atema taoba mapang Air Marshal-i ochimashi mapa inyakba atema tai tongloktsü.
Taoba mapang Air Force tongtii AgustaWestland nem tim masüba nung maongka agütsü aser sübokrem agütsütsü atema senotsü bushi ta tai tongloktsü.
Taoba mapangtem nunga CBI-i 2007 küm mapa nungi anisüngzüksang Tyagi dang aiben asüngdangyaogo, saka pa nem tai tonglokja alibaji pai menangzüki aru.
Taküm August ita nung contract atema tiyongtsüi ia jembir, Christian James Michel-i shidi ka ajanga CBI dang, pai amalitepa inyaktsü, anungji pa anema Interpol red corner notice benoka alibaji agienang, ta mepishia liasü.
August 25 nü züluba shidi nungji pa atema jembitsür English law firm-i, CBI den yariteptsü atema Michel-i melunga lir ta shia senden ka amentsü mepishia liasü.
Michel-ia, pai aibelena mali aser osangtsüsang agütsüba ajanga pai CBI yaritettsü, ta shia liasü.
Sen crore 3,727 indang AgustaWestland den tezüngzüktep agia India nem VVIP helicopter 12 agütsütsü bangjemba nung Michel-ia tongti shilem ka agia lir.
Italian defence giant Finmeccanica, indang subsidiary, AugustaWestland-i iba tezüngzüktep agitettsü atema sübokrem sen crore 370 dak tema agütsü ta aija lir.